ബംഗാളിനോട് കനത്ത പരാജയം ഏറ്റുവാങ്ങി കേരളം

തിരുവനന്തപുരം മംഗലപുരത്തെ കെസിഎ ക്രിക്കറ്റ് ഗ്രൗണ്ടിൽ നടന്ന രഞ്ജി ട്രോഫി മത്സരത്തിൽ കേരളത്തിന് കനത്ത തോൽവി. കരുത്തരായ ബംഗാളിനെതിരെ ചെറുത്തുനിൽപ്പ് നടത്താൻ കഴിയാതെ പോയ കേരളം 287 റൺസിന്റെ കൂറ്റൻ തോൽവിയാണ് വഴങ്ങിയത്. മത്സരത്തിൽ ബംഗാൾ ഉയർത്തിയ വിജയലക്ഷ്യത്തിന് മുന്നിൽ പതറിയ കേരള ബാറ്റിംഗ് നിര രണ്ട് ഇന്നിംഗ്സുകളിലും തകർന്നടിയുകയായിരുന്നു.

​ബംഗാൾ ബൗളർമാരായ പ്രദീപ്ത പ്രമാണിക്, ഇന്ത്യൻ പേസർ മുഹമ്മദ് ഷമി എന്നിവരുടെ മികച്ച പ്രകടനമാണ് കേരളത്തിന്റെ ബാറ്റിംഗ് നിരയെ തകർത്തത്. മത്സരത്തിൽ ഉടനീളം തിളങ്ങിയ പ്രദീപ്ത പ്രമാണിക് ആദ്യ ഇന്നിംഗ്സിൽ 4 വിക്കറ്റും രണ്ടാം ഇന്നിംഗ്സിൽ 6 വിക്കറ്റും ഉൾപ്പെടെ ആകെ 10 വിക്കറ്റുകൾ വീഴ്ത്തി.
മറുവശത്ത് പരിചയസമ്പന്നനായ മുഹമ്മദ് ഷമി ആദ്യ ഇന്നിംഗ്സിൽ 3 വിക്കറ്റും രണ്ടാം ഇന്നിംഗ്സിൽ 2 വിക്കറ്റും നേടി ബംഗാളിന്റെ വിജയത്തിൽ നിർണ്ണായക പങ്കുവഹിച്ചു. കേരളം ആദ്യ ഇന്നിംഗ്സിൽ 120 റൺസിനും രണ്ടാം ഇന്നിംഗ്സിൽ 141 റൺസിനും പുറത്താവുകയായിരുന്നു.