മുൻ ഇന്ത്യൻ ക്യാപ്റ്റൻ മഹേന്ദ്ര സിംഗ് ധോണിക്ക് 40 വയസ്സ് വരെ സജീവ ക്രിക്കറ്റിൽ കളിക്കാൻ കഴിയുമെന്ന് മുൻ ഓസ്‌ട്രേലിയൻ താരം ഷെയിൻ വാട്സൺ. ധോണി തന്റെ ആരോഗ്യം നല്ല രീതിയിൽ പരിപാലിച്ചിട്ടുണ്ടെന്നും വാട്സൺ പറഞ്ഞു. ചെന്നൈ സൂപ്പർ കിങ്സിൽ ധോണിയുടെ സഹ താരം കൂടിയാണ് ഷെയിൻ വാട്സൺ.
കഴിഞ്ഞ വർഷം ജൂലൈ മാസത്തിലാണ് ധോണി അവസാനമായി പ്രൊഫഷണൽ ക്രിക്കറ്റ് കളിച്ചത്. അന്ന് ലോകകപ്പിൽ ന്യൂസിലാൻഡിനോട് തോറ്റ് ഇന്ത്യ പുറത്തായതിന് ശേഷം ധോണി ക്രിക്കറ്റ് കളിച്ചിട്ടില്ല. എന്നാൽ 40 വയസ്സ് വരെ ധോണിക്ക് ഐ.പി.എല്ലിൽ മാത്രമല്ല ഇന്റർനാഷണൽ ക്രിക്കറ്റിലും കളിക്കാൻ കഴിയുമെന്നും വാട്സൺ പറഞ്ഞു. ധോണി ഇപ്പോഴും കളിക്കുന്നത് ഒരുപാട് ഇഷ്ട്ടപെടുന്നുണ്ടെന്നും റൺസ് എടുക്കാനുള്ള ഓട്ടത്തിലും സ്റ്റമ്പിന് പിറകിലും ധോണി ഇപ്പോഴും മികച്ച പ്രകടനമാണ് പുറത്തെടുക്കുന്നതെന്നും വാട്സൺ പറഞ്ഞു.
