ചെന്നൈയില്‍ സ്പിന്നര്‍മാര്‍ക്ക് ലഭിച്ച പിന്തുണ ഇനി തങ്ങളുടെ മത്സരങ്ങള്‍ നടക്കുന്ന മുംബൈയില്‍ ഉണ്ടാകില്ലെന്ന് പറഞ്ഞ യൂസുവേന്ദ്ര ചഹാല്‍. ആര്‍സിബിയ്ക്കായി ഇന്നലെ നാലോവറില്‍ 34 റണ്‍സ് വിട്ട് നല്‍കി 2 വിക്കറ്റാണ് ചഹാല്‍ നേടിയത്.
ഇതില്‍ മികച്ച ഫോമിലുള്ള നിതീഷ് റാണയുടെയും ദിനേശ് കാര്‍ത്തിക്കിന്റെയും വിക്കറ്റുകള്‍ ഉള്‍പ്പെടുന്നു. തന്റെ അവസാന ഓവറില്‍ ആന്‍ഡ്രേ റസ്സലിന്റെ കൈയ്യില്‍ നിന്ന് താരം കണക്കറ്റ് പ്രഹരമേറ്റു വാങ്ങിയിരുന്നു.
മൂന്നോവറില്‍ 14 റണ്‍സ് മാത്രം വഴങ്ങി 2 വിക്കറ്റ് നേടിയ താരത്തിന്റെ അവസാന ഓവറില്‍ റസ്സല്‍ രണ്ട് സിക്സും മൂന്ന് ഫോറും നേടിയപ്പോള്‍ ഓവറില്‍ നിന്ന് 20 റണ്‍സാണ് പിറന്നത്. തനിക്ക് റസ്സലിനെ ഔട്ടാക്കണെന്നുണ്ടായിരുന്നുവെന്നും അതിനാല്‍ തന്നെ വൈഡ് ആയിട്ടാണ് പന്തെറിഞ്ഞതെന്നും എന്നാല്‍ ലെഗ് സൈഡ് ബൗണ്ടറി ചെറുതായിരുന്നതിനാല്‍ തന്റെ പദ്ധതിയിലും ഫീല്‍ഡിലും ചെറിയ മാറ്റം വരുത്തേണ്ടി വന്നുവെന്ന് ചഹാല്‍ വ്യക്തമാക്കി.
ചില മത്സരങ്ങളില്‍ മികച്ച രീതിയില്‍ പന്തെറിഞ്ഞാലും വിക്കറ്റ് ലഭിച്ചില്ലെങ്കില്‍ അത് വിഷമമുണ്ടാക്കുമെന്നും തനിക്ക് കൊല്‍ക്കത്തയ്ക്കെതിരെ ആദ്യ വിക്കറ്റ് ലഭിച്ചപ്പോള്‍ താനിത്തിരി വികാരനിര്‍ഭരനായിയെന്നും ചഹാല്‍ സമ്മതിച്ചു.
