ഡല്ഹിയ്ക്കെതിരെ മികച്ച സ്കോര് നേടിയെങ്കിലും പഞ്ചാബ് കിംഗ്സിന് തോല്വിയായിരുന്നു ഫലം. ശിഖര് ധവാന്റെ ബാറ്റിംഗ് മികവില് പഞ്ചാബ് നല്കിയ ലക്ഷ്യം അനായാസം ഡല്ഹി ക്യാപിറ്റല്സ് മറികടക്കുകയായിരുന്നു.
മത്സരത്തില് പഞ്ചാബിന് കാര്യങ്ങള് കൂടുതല് ശ്രമകരമാക്കിയത് ഡ്യൂ ആണെന്നും പഞ്ചാബ് കിംഗ്സ് നായകന് പറഞ്ഞു. വെറ്റായ ബോളില് പന്തെറിയുക എന്നത് പ്രയാസകരമാണെന്നും ബോള് മാറ്റുവാന് താന് ആവശ്യപ്പെട്ടുവെങ്കിലും അമ്പയര്മാര് റൂള് ബുക്കിനെ ചൂണ്ടിക്കാണിച്ച് തന്റെ ആവശ്യം നിരസിക്കുകയായിരുന്നുവെന്നും രാഹുല് കൂട്ടിചേര്ത്തു.
താനും മയാംഗും നല്കിയ തുടക്കത്തിന്റെ ബലത്തില് ഇരുനൂറിന് മേലുള്ള സ്കോര് നേടേണ്ടതായിരുന്നുവെന്നും ഇനിയുള്ള മത്സരങ്ങളില് ടീം ശക്തമായ തിരിച്ചുവരവ് നടത്തുമെന്നും ലോകേഷ് രാഹുല് പറഞ്ഞു. തന്റെ ജന്മദിനത്തിന്റെ അന്ന് വിജയം നേടുവാനായിരുന്നുവെങ്കില് അത് മധുരകരമായിരുന്നേനെ എന്നും താരം പറഞ്ഞു.
