കേരള ക്രിക്കറ്റിന്റെ ചരിത്രത്തിലേക്ക് തന്റെ പേര് എഴുതി ചേർത്തിരിക്കുകയാണ് മിന്നു മണി. 23കാരിയായ ഓഫ് സ്പിന്നിംഗ് ഓൾറൗണ്ടർ മിന്നു മണി, ഇന്നലെ നടന്ന വനിതാ പ്ലെയർ ലീഗ് (ഡബ്ല്യുപിഎൽ) ലേലത്തിൽ കേരളത്തിൽ നിന്ന് തിരഞ്ഞെടുക്കപ്പെട്ട ഏക കളിക്കാരിയായി. 30 ലക്ഷം രൂപ നൽകി ഡൽഹി ക്യാപിറ്റൽസ് ആണ് മിന്നു മണിയെ സ്വന്തമാക്കിയത്. കേരളത്തിൽ നിന്ന് ലേലത്തിൽ ഉണ്ടായിരുന്ന ബാക്കി താരങ്ങൾക്ക് ഇത്തവണ അവസരം ലഭിച്ചില്ല.
വയനാട് ജില്ലയിൽ നിന്നുള്ള കുറിച്യ ഗോത്രത്തിൽ നിന്നുള്ള മിന്നുവിന്റെ WPLലേക്കുള്ള വളർച്ച പലർക്കും പ്രചോദനമാകും എന്ന കാര്യത്തിൽ സംശയമില്ല. മിന്നുവിന്റെ അച്ഛൻ മണി സികെ കൂലിപ്പണിയെടുക്കുന്ന ഒരു സാധാരണക്കാരൻ ആണ്. അമ്മ വസന്ത ഒരു വീട്ടമ്മയും ആണ്.
ഈയിടെയായി മികച്ച ഫോമിലാണ് മിന്നു മണി കളിക്കുന്നത്‌. ഞായറാഴ്ച നടന്ന സീനിയർ വനിതാ ഇന്റർ സോണൽ ഏകദിന ടൂർണമെന്റിൽ പുറത്താകാതെ 74 റൺസ് നേടി സൗത്ത് സോണിനെ ജയിപ്പിക്കാൻ മിന്നുവിനായിരുന്നു. ഡെൽഹി ക്യാപിറ്റൽസിൽ എത്തിയ സന്തോഷം പ്രകടിപ്പിച്ച് മിന്നു. മറ്റ് കേരള താരങ്ങൾക്ക് അവസരം നേടാനാകാത്തതിൽ നിരാശയുണ്ടെന്നും പറഞ്ഞു. ഞങ്ങളിൽ ഒരാളെങ്കിലും WPLൽ ഉണ്ടെന്നതിൽ എനിക്ക് സന്തോഷമുണ്ട്. കൂടാതെ ജെമിമ റോഡ്രിഗസ്, ഷഫാലി വർമ്മ തുടങ്ങിയ താരങ്ങൾക്കൊപ്പം ചേരാൻ പോകുന്നതിൽ എനിക്ക് സന്തോഷമുണ്ട് എന്നും മിഞു സ്പോർട്സ് സ്റ്റാറിനോട് പറഞ്ഞു.
