ഐപിഎലില്‍ മികച്ചൊരു ശതകം ആണ് ഇന്നലെ പ്രഭ്സിമ്രാന്‍ സിംഗ് പഞ്ചാബ് കിംഗ്സിനായി നേടിയത്. താരം 65 പന്തിൽ 103 റൺസ് നേടി പുറത്തായപ്പോള്‍ പഞ്ചാബിന്റെ ആകെ സ്കോര്‍ 167 റൺസായിരുന്നു. ഫിലിപ്പ് സാള്‍ട്ട് – ഡേവിഡ് വാര്‍ണര്‍ നൽകിയ മിന്നും തുടക്കത്തിന് ശേഷം എതിരാളികളെ 136 റൺസിലൊതുക്കി 31 റൺസ് വിജയം ആണ് പഞ്ചാബ് നേടിയത്.
ടോപ് ഓര്‍ഡറില്‍ പഞ്ചാബിന് ഏതാനും വിക്കറ്റുകള്‍ നഷ്ടമായി എന്നും അതിനാൽ തന്നെ അവസാനം വരെ മത്സരം കൊണ്ടെത്തിക്കുക എന്ന ദൗത്യമായിരുന്നു തന്റേതെന്നും പ്രഭ്സിമ്രാന്‍ സിംഗ് വ്യക്തമാക്കി. താനിപ്പോള്‍ ടീമിനൊപ്പം ഏറെ നാളായെന്നും അതിനാൽ തന്നെ ലഭിയ്ക്കുന്ന അവസരങ്ങള്‍ കൈ നീട്ടി സ്വീകരിച്ച് ഫലപ്രദമായി ഉപയോഗിക്കുക എന്നതാണ് പ്രധാനം എന്നും താരം കൂട്ടിചേര്‍ത്തു.
തനിക്ക് നൽകിയ അവസരങ്ങള്‍ക്ക് മാനേജ്മെന്റിനോട് ഏറെ നന്ദിയുണ്ടെന്നും പഞ്ചാബ് കിംഗ്സ് ഓപ്പണര്‍ സൂചിപ്പിച്ചു.
