വാങ്കഡേയിലെ പിച്ചില്‍ നിന്ന് ഏറെ വ്യത്യസ്തമാണ് ചെന്നൈയിലെ പിച്ചെന്നും ബാറ്റിംഗ് ദുഷ്കരമായേക്കാം എന്ന ബോധ്യം ടീമിന് ഉണ്ടായിരുന്നുവെന്നും പറഞ്ഞ് ഡല്‍ഹി ക്യാപിറ്റല്‍സ് ഓപ്പണര്‍ ശിഖര്‍ ധവാന്‍. ഇന്നലെ മുംബൈയ്ക്കെതിരെയുള്ള മത്സരത്തില്‍ 45 റണ്‍സ് നേടിയ ശിഖര്‍ ധവാന്‍ ടൂര്‍ണ്ണമെന്റിലെ ഓറഞ്ച് ക്യാപ്പും സ്വന്തമാക്കിയിരുന്നു.
മുംബൈയെ പോലെ ഒരു ടീമിനെ പരാജയപ്പെടുത്തുവാനായത് ടീമിന്റെ ആത്മവിശ്വാസത്തെ ഉയര്‍ത്തുമെന്നും പാര്‍ട്ട്ണര്‍ഷിപ്പുകള്‍ പ്രാധാന്യമുള്ളതാണെന്ന് ടീം ചര്‍ച്ച ചെയ്തിരുന്നുവെന്നും ശിഖര്‍ ധവാന്‍ വ്യക്തമാക്കി. ലളിത് യാദവുമായുള്ള കൂട്ടുകെട്ട് മികച്ചതായിരുന്നുവെന്നും എന്നാല്‍ മത്സരം ഫിനിഷ് ചെയ്യാനാകാത്തതില്‍ വിഷമമുണ്ടെന്നും ധവാന്‍ പറഞ്ഞു.
മത്സരാന്ത്യം ടീം അര്‍ഹമായ വിജയം സ്വന്തമാക്കിയതില്‍ ഏറെ സന്തോഷമുണ്ടെന്നും ശിഖര്‍ ധവാന്‍ സൂചിപ്പിച്ചു.
