തന്റെ അരങ്ങേറ്റ ഐപിഎല്‍ മത്സരത്തില്‍ ശ്രദ്ധേയമായ പ്രകടനം പുറത്തെടുത്ത അര്‍ഷ്ദീപ് സിംഗിന്റെ പ്രകടനത്തെ പുകഴ്ത്തി രവിചന്ദ്രന്‍ അശ്വിന്‍. ടോപ് ഓര്‍ഡറില്‍ ജോസ് ബട്‍ലറെയും ഇന്നിംഗ്സിന്റെ അവസാനത്തോടെ അജിങ്ക്യ രഹാനയെയും പുറത്താക്കിയ അര്‍ഷ്ദീപ് സിംഗ് തന്റെ നാലോവറില്‍ 43 റണ്‍സ് വഴങ്ങിയെങ്കിലും മികച്ച രീതിയിലാണ് പന്തെറിഞ്ഞത്.
പന്ത് ഇരുവശത്തേക്ക് സ്വിംഗ് ചെയ്യുവാന്‍ ശേഷിയുള്ള താരമാണ് അര്‍ഷ്ദീപ് എന്നാണ് രവിചന്ദ്രന്‍ അശ്വിന്‍ വ്യക്തമാക്കിയത്. ഇത്തരം ഒരു താരം പവര്‍പ്ലേയില്‍ വളരെ ഏറെ പ്രാധാന്യമുള്ള താരമാണ്. ദീപക് ചഹാര്‍ ചെന്നൈയ്ക്ക് വേണ്ടി എന്ത് ചെയ്യുന്നുവെന്ന് ഏവരും കണ്ടതാണ്, അത്തരം പ്രതീക്ഷയാണ് ഞങ്ങള്‍ക്ക് അര്‍ഷ്ദീപ് സിംഗിലുള്ളതെന്നും അശ്വിന്‍ വ്യക്തമാക്കി. ടൂര്‍ണ്ണമെന്റില്‍ താരം കിംഗ്സ് ഇലവനു വേണ്ടി ഇനിയും മികവ് പുലര്‍ത്തുമെന്ന് അശ്വിന്‍ പറഞ്ഞു.
