ശ്രീലങ്കക്കെതിരായ ടെസ്റ്റ് പരമ്പരയിൽ നിന്ന് പാകിസ്ഥാൻ ഫാസ്റ്റ് ബൗളർ ഹസൻ അലി പുറത്ത്. വാരിയെല്ലിനേറ്റ പരിക്കിനെ തുടർന്നാണ് താരം പരമ്പരയിൽ നിന്ന് പുറത്തായത്. താരത്തിന്റെ പരിക്ക് സാരമുള്ളതണെന്നും 6 ആഴ്ചയോളം താരം പുറത്തിരിക്കേണ്ടി വരുമെന്നും പാകിസ്ഥാൻ ക്രിക്കറ്റ് ബോർഡ് വ്യക്തമാക്കി.
പുറം വേദന കാരണം ഏഴ് ആഴ്ചയോളം പുറത്തിരുന്ന ഹസൻ അലി കഴിഞ്ഞ ആഴ്ചയാണ് ക്വായിദ് ഇ അസം ട്രോഫിയിൽ കളിക്കാൻ ഇറങ്ങിയത്. തുടർന്ന് കഴിഞ്ഞ ദിവസം നടന്ന മത്സരത്തിന് തൊട്ടുമുൻപ് താരത്തിന് വേദന വരുകയും സ്കാനിംഗിന് വിധേയമാവുകയും ചെയ്തതോടെയാണ് താരത്തിന്റെ പരിക്ക് സ്ഥിരീകരിച്ചത്.
കഴിഞ്ഞ ലോകകപ്പിൽ ഇന്ത്യക്കെതിരെയാണ് ഹസൻ അലി അവസാനസമായി പാകിസ്ഥാന് വേണ്ടി കളിച്ചത്. ഡിസംബർ 11ന് റാവൽപിണ്ടിയിൽ വെച്ചാണ് ആദ്യ ടെസ്റ്റ് മത്സരം.
