രാഹുല്‍ ദ്രാവിഡിൽ നിന്ന് ക്രിക്കറ്റ് പഠിക്കുവാന്‍ അവസരം ലഭിച്ച താരങ്ങള്‍ ഭാഗ്യവാന്മാരാണെന്ന് പറഞ്ഞു സഞ്ജു സാംസൺ. ഇന്ത്യ എ ടീമിലെയോ ജൂനിയര്‍ സംഘത്തിലെയോ താരങ്ങള്‍ക്ക് രാഹുല്‍ ദ്രാവിഡിനൊപ്പം പ്രവര്‍ത്തിക്കുവാന്‍ ഉള്ള ഭാഗ്യം സിദ്ധിച്ചിട്ടുണ്ടെന്നും രാജസ്ഥാന്‍ റോയല്‍സിന് വേണ്ടി ട്രയൽസിന് പോയ ദിവസം താനിന്നും ഓര്‍മ്മിക്കുന്നുണ്ടെന്ന് സഞ്ജു വ്യക്തമാക്കി.
താനന്ന് നന്നായി ബാറ്റ് ചെയ്തപ്പോള്‍ രാഹുല്‍ ദ്രാവിഡ് തന്നെ വിളിച്ച് എന്റെ ടീമിന് വേണ്ടി കളിക്കുന്നുവോ എന്നാണ് ചോദിച്ചതെന്നും അത് തനിക്ക് ഒരിക്കലും മറക്കാനാകാത്ത ഒരു നിമിഷമാണെന്നും സഞ്ജു സൂചിപ്പിച്ചു. ഇന്ത്യയുടെ ശ്രീലങ്കന്‍ ടൂറിന്റെ കോച്ചായി രാഹുല്‍ ദ്രാവിഡ് എത്തുമ്പോള്‍ ആ ടീമിൽ നല്ലൊരു ശതമാനം താരങ്ങള്‍ രാഹുലിന്റെ കീഴിൽ അണ്ടര്‍ 19, ഇന്ത്യ എ ടീമുകളിൽ കളിച്ചവരാണെന്നുള്ള പ്രത്യേകത കൂടിയുണ്ട്.
