മുൽത്താന്‍ ടെസ്റ്റിലും പാക്കിസ്ഥാനെതിരെ വിജയം കുറിച്ച് ഇംഗ്ലണ്ട്. ഇന്ന് മത്സരത്തിന്റെ നാലാം ദിവസം ആരംഭിയ്ക്കുമ്പോള്‍ പാക്കിസ്ഥാന് 6 വിക്കറ്റ് കൈവശമുള്ളപ്പോള്‍ 157 റൺസായിരുന്നു നേടേണ്ടിയിരുന്നത്. 80 റൺസ് കൂട്ടുകെട്ടുമായി സൗദ് ഷക്കീലും മൊഹമ്മദ് നവാസും പ്രതീക്ഷ നൽകിയെങ്കിലും 328 റൺസിൽ പാക് ഇന്നിംഗ്സ് അവസാനിച്ചപ്പോള്‍ 26 റൺസ് വിജയവുമായി രണ്ടാം ടെസ്റ്റും ഇംഗ്ലണ്ട് സ്വന്തമാക്കി.
മാര്‍ക്ക് വുഡ് നാല് വിക്കറ്റ് നേടിയപ്പോള്‍ പാക്കിസ്ഥാന് പ്രതീക്ഷ നൽകിയത് സൗദ് ഷക്കീൽ(94), ഇമാം-ഉള്‍-ഹക്ക്(60) കൂട്ടുകെട്ടായിരുന്നു. എന്നാൽ ഇമാമിനെ ജാക്ക് ലീഷ് പുറത്താക്കിയപ്പോള്‍ മൊഹമ്മദ് നവാസുമായി 80 റൺസ് കൂട്ടുകെട്ട് സൗദ് നേടി.
45 റൺസ് നേടിയ നവാസിനെയും സൗദ് ഷക്കീലിനെയും തന്റെ അടുത്തടുത്ത ഓവറുകളിൽ പുറത്താക്കി മാര്‍ക്ക് വുഡ് പാക്കിസ്ഥാന്റെ പ്രതീക്ഷകളെ അവസാനിപ്പിച്ചു.
