ശ്രീലങ്കന്‍ ടെസ്റ്റ് പരമ്പരയില്‍ നിന്ന് പിന്മാറുവാനുള്ള ഇംഗ്ലണ്ട് ബോര്‍ഡിന്റെ തീരുമാനം വളരെ കടുത്തതെങ്കിലും അനുയോജ്യമായ ഒന്നെന്ന് വ്യക്തമാക്കി ഇംഗ്ലണ്ട് പേസര്‍ സ്റ്റുവര്‍ട് ബ്രോഡ്. കൊറോണ ഭീതിയെ തുടര്‍ന്നാണ് ടെസ്റ്റ് പരമ്പരയില്‍ നിന്ന് ഇംഗ്ലണ്ട് പിന്മാറുവാന്‍ തീരുമാനിച്ചത്. ശ്രീലങ്കയില്‍ ആ സമയത്ത് വലിയ തോതില്‍ പ്രശ്നങ്ങളില്ലായിരുന്നുവെങ്കിലും പിന്നീട് കൂടുതല്‍ റിപ്പോര്‍ട്ടുകള്‍ വരികയായിരുന്നു.
ലോകമെമ്പാടുമുള്ള കായിക ഇനങ്ങള്‍ മാറ്റി വയ്ക്കുകയോ ഉപേക്ഷിക്കുകയോ ചെയ്യുന്ന സാഹചര്യം ഉടലെടുത്തപ്പോള്‍ ഇംഗ്ലണ്ട് ബോര്‍ഡും കളിക്കാരുടെയും കാണികളുടെയും സുരക്ഷയെ കരുതി സമാനമായ തീരുമാനമെടുക്കുകയായിരുന്നു. സാമ്പത്തിക വശങ്ങളെ പരിഗണക്കുമ്പോള്‍ ഇരു ബോര്‍ഡുകള്‍ക്കും ഇത് വലിയ നഷ്ടം വരുത്തുന്നതാണ് അതാണ് താന്‍ ഇതിനെ കടുത്ത തീരുമാനമെന്ന് വിശേഷിപ്പിച്ചത്. എന്നാല്‍ പണമല്ല സുരക്ഷയാണ് പ്രധാനമെന്ന് ബോര്‍ഡ് തെളിയിച്ചുവെന്നും ബ്രോഡ് വ്യക്തമാക്കി.
