ത്രില്ലര്‍ വിജയത്തിനു ശേഷം അനായാസ ജയവുമായി ധാക്ക ഡൈനാമൈറ്റ്സ്. ഇന്ന് നടന്ന രണ്ടാം മത്സരത്തില്‍ 32 റണ്‍സിനാണ് ഡൈനാമൈറ്റ്സ് സില്‍ഹെറ്റ് സിക്സേര്‍സിനെതിരെ വിജയം കുറിച്ചത്. ആദ്യം ബാറ്റ് ചെയ്ത ധാക്ക 173/7 എന്ന സ്കോര്‍ നേടിയപ്പോള്‍ സിക്സേര്‍സ് 141 റണ്‍സാണ് 9 വിക്കറ്റ് നഷ്ടത്തില്‍ ടീം നേടിയത്. നിക്കോളസ് പൂരന്‍ ഏകനായി 47 പന്തില്‍ നിന്ന് 9 സിക്സുകളുടെ സഹായത്തോടെ 72 റണ്‍സ് നേടിയെങ്കിലും സഹതാരങ്ങളാരും തന്നെ മികവ് പുലര്‍ത്താതിരുന്നത് സിക്സേര്‍സിനു തിരിച്ചടിയായി. ധാക്കയ്ക്ക് വേണി റൂബല്‍ ഹൊസൈന്‍ മൂന്ന് വിക്കറ്റ് നേടിയപ്പോള്‍ ഷാക്കിബ് അല്‍ ഹസന്‍, ഷുവഗാത ഹോം എന്നിവര്‍ രണ്ട് വീതം വിക്കറ്റ് നേടി.
നേരത്തെ ആദ്യം ബാറ്റ് ചെയ്ത ധാക്കയ്ക്ക് വേണ്ടി റോണി താലൂക്ദാര്‍ 34 പന്തില്‍ നിന്ന് 58 റണ്‍സ് നേടി തിളങ്ങിയപ്പോള്‍ സുനില്‍ നരൈന്‍(25), ഷാക്കിബ് അല്‍ ഹസന്‍(23) എന്നിവര്‍ക്കൊപ്പം നൈം ഷെയ്ഖ് 25 നിര്‍ണ്ണായക റണ്‍സ് നേടി പുറത്താകാതെ നിന്നു. സിക്സേര്‍സിനു വേണ്ടി ടാസ്കിന്‍ അഹമ്മദ് മൂന്ന് വിക്കറ്റ് നേടി.
