ലോക ടി20യിലെ ഒന്നാം നമ്പര്‍ താരമായ ബാബര്‍ അസമിനെ വരാനിരിക്കുന്ന ടി20 ബ്ലാസ്റ്റ് സീസണിനു വേണ്ടിയുള്ള ടീമിലേക്ക് തിരഞ്ഞെടുത്ത് ഇംഗ്ലീഷ് കൗണ്ടിയായ സോമര്‍സെറ്റ്. ജൂലൈ 18നു ആരംഭിയ്ക്കുന്ന ടൂര്‍ണ്ണമെന്റിനു വേണ്ടിയാണ് താരത്തെ സോമര്‍സെറ്റ് സ്വന്തമാക്കിയിരിക്കുന്നത്. എന്നാല്‍ സെപ്റ്റംബര്‍ 21നു നടക്കുന്ന ഫൈനലിലേക്ക് ടീം യോഗ്യത നേടിയാല്‍ താരം കളിയ്ക്കാനുണ്ടാകുമോ എന്നതില്‍ ഉറപ്പില്ല.
തനിയ്ക്ക് ലഭിച്ച പുതിയ അവസരത്തെ താന്‍ ഉറ്റു നോക്കുകയാണെന്നാണ് അസം ഈ നീക്കത്തെക്കുറിച്ച് പറഞ്ഞത്. മുമ്പ് അസമിന്റെ സഹ കളിക്കാര‍ന്‍ അസ്ഹര്‍ അലി സോമര്‍സെറ്റിനു വേണ്ടി കളിച്ചിട്ടുണ്ട്, അന്ന് അസ്ഹറില്‍ നിന്ന് സോമര്‍സെറ്റിനെക്കുറിച്ച് നല്ല കാര്യങ്ങളാണ് കേട്ടിട്ടുള്ളതെന്നും ബാബര്‍ അസം പറഞ്ഞു. താരങ്ങള്‍ക്ക് മികച്ച പിന്തുണയാണ് സോമര്‍സെറ്റ് നല്‍കുന്നതെന്നാണ് താന്‍ മനസ്സിലാക്കുന്നതെന്നു ബാബര്‍ അസം പറഞ്ഞു.
