പാക്കിസ്ഥാന്‍ ബാറ്റിംഗിന്റെ നെടുംതൂണെന്നും ഭാവിയില്‍ ലോക ക്രിക്കറ്റ് കീഴടക്കുവാന്‍ പോകുന്ന താരമെന്നും വിശേഷിപ്പിക്കപ്പെടുന്ന ഒരാളാണ് ബാബര്‍ അസം. ടെസ്റ്റില്‍ ഇപ്പോള്‍ തന്നെ രണ്ടായിരം റണ്‍സ് തികച്ച താരത്തിന്റെ നിലവാരം അടുത്ത തലത്തിലേക്ക് എത്തിക്കുവാന്‍ തന്നാല്‍ കഴിയുന്ന വിധത്തിലുള്ള സഹായം പ്രതീക്ഷിക്കാമെന്നാണ് പാക്കിസ്ഥാന്‍ ബാറ്റിംഗ് കോച്ച് യൂനിസ് ഖാന്‍ പറയുന്നത്.
ലോകത്തിന് മുഴുവന്‍ താരത്തിന്റെ കഴിവ് അറിയാം, വളരെ പ്രത്യേകത നിറഞ്ഞ താരമാണ് ബാബര്‍ അസം എന്നതില്‍ യാതൊരുവിധ തര്‍ക്കവും ആര്‍ക്കും കാണുകയില്ല. താരം വലിയ സ്കോറുകള്‍ നേടുന്നു എന്ന് ഉറപ്പാക്കുകയാണ് ഒരു ബാറ്റിംഗ് കോച്ചെന്ന നിലയില്‍ താന്‍ ശ്രമിക്കുന്നതെന്നും അതിനുള്ള ശ്രമങ്ങള്‍ ഞങ്ങളിരുവരും ചെയ്ത് വരുമെന്നും യൂനിസ് ഖാന്‍ വ്യക്തമാക്കി.
ബാബര്‍ ഒരു ഇതിഹാസ താരമായി മാറുമെന്നാണ് തന്റെ പ്രതീക്ഷയെന്നും മറ്റു താരങ്ങളുമായുള്ള അനാവശ്യ താരതമ്യങ്ങള്‍ ഒഴിവാക്കുകയാണ് താരത്തിനോട് ചെയ്യാനാകുന്ന ഏറ്റവും വലിയ നീതിയെന്നും താരത്തെ ഇത്തരത്തില്‍ സമ്മര്‍ദ്ദത്തിലാക്കുവാന്‍ ശ്രമിക്കരുതെന്നും യൂനിസ് ഖാന്‍ വ്യക്തമാക്കി.
