ഇന്ത്യൻ ക്രിക്കറ്റ് ടീമിനെ പരിശീലിപ്പിക്കാൻ അവസരം ലഭിച്ചാൽ ഇരു കൈയും നീട്ടി സ്വീകരിക്കുമെന്ന് മുൻ ഇന്ത്യൻ നായകൻ മുഹമ്മദ് അസ്ഹറുദ്ധീൻ. നിലവിൽ ഹൈദരാബാദ് ക്രിക്കറ്റ് അസോസിയേഷൻ പ്രസിഡന്റാണ് അസ്ഹറുദ്ധീൻ. ഇന്ത്യൻ ടീമിനൊപ്പം പ്രവർത്തിക്കാൻ തനിക്ക് അവസരം ലഭിച്ചാൽ താൻ അത് ഒരു കാരണവശാലും ഒഴിവാക്കില്ലെന്നും അസ്ഹർ പറഞ്ഞു. നിലവിൽ ഇന്ത്യൻ ടീമിന്റെ പരിശീലകനായ രവി ശാസ്ത്രിയുടെ കാലാവധി 2021ൽ നടക്കുന്ന ടി20 ലോകകപ്പ് വരെയാണ്.
അതെ സമയം ഇന്ത്യൻ ടീമിന്റെ കൂടെ കൂടുതൽ സ്റ്റാഫുകൾ യാത്ര ചെയ്യുന്നത് എന്തിനാണെന്ന് മുൻ ഇന്ത്യൻ ക്യാപ്റ്റൻ ചോദിച്ചു. താൻ ബാറ്റിങ്ങിലും ഫീൽഡിങ്ങിലും സ്‌പെഷലൈസ് ചെയ്ത ആളാണെന്നും താൻ ഒരു ടീമിനെ പരിശീലിപ്പിക്കുകയാണെങ്കിൽ വേറെ ഒരു ബാറ്റിംഗ് പരിശീലകന്റെ ആവശ്യം ഇല്ലെന്നും അസ്ഹർ പറഞ്ഞു. ക്രിക്കറ്റിലെ ടി20 ഫോർമാറ്റ് ആസ്വദിക്കുന്നുണ്ടോ എന്ന ചോദ്യത്തിന് ആസ്വദിക്കുന്നുണ്ടെന്നും എന്നാൽ ഫ്രാഞ്ചൈസി ഉടമകൾ എന്നെ സ്വന്തമാക്കുമോ എന്ന് അവരോട് ചോദിക്കണമെന്നും അസ്ഹർ പറഞ്ഞു.
