വിന്‍ഡീസ് ടെസ്റ്റ് പരമ്പരയ്ക്കുള്ള ഇന്ത്യന്‍ ടീമിലേക്ക് പരിഗണിക്കുവാന്‍ രവിചന്ദ്രന്‍ അശ്വിനും ഇഷാന്ത് ശര്‍മ്മയ്ക്കും ഫിറ്റ്നെസ്സ് ടെസ്റ്റ് നിര്‍ബന്ധമാണെന്ന് അറിയിച്ച് ബിസിസിഐ. ഇന്നലെ ഇന്ത്യന്‍ ടീമിന്റെ പ്രഖ്യാപനം വരാനിരുന്നതാണെങ്കില്‍ ഈ രണ്ട് താരങ്ങളുടെയും അഭാവത്തില്‍ ഫിറ്റ്നെസ്സ് ടെസ്റ്റ് വൈകുന്നതിനാലാണ് പ്രഖ്യാപനം മാറ്റിയത്. സെലക്ടര്‍മാരെല്ലാവരും തിരക്കിലായതിനാലും പ്രഖ്യാപനം മാറ്റിവയ്ക്കപ്പെട്ടുവെന്നും അറിയുന്നുണ്ട്. ഇരു താരങ്ങളും ഇന്ത്യന്‍ ടീമിലെ പ്രധാന അംഗങ്ങളാണെന്നതിനാല്‍ തന്നെ ഇവരുടെ ഫിറ്റ്നെസ്സിനു പ്രാധാന്യമുണ്ടെന്നാണ് ബിസിസിഐ അധികാരികള്‍ അറിയിച്ചത്.
സെപ്റ്റംബര്‍ 29നു ഇരു താരങ്ങളും ഫിറ്റ്നെസ്സ് ടെസ്റ്റിനു വിധേയനാകുമെന്നാണ് ഇപ്പോള്‍ ലഭിയ്ക്കുന്ന വിവരം. എന്‍സിഎയില്‍ ഗ്രോയിന്‍ ഇഞ്ച്വറിയുടെ പരിക്കിനു റീഹാബിലേഷനില്‍ ഏര്‍പ്പെട്ട് വരികയാണ് അശ്വിന്‍. ഫിസിയോകള്‍ ഇരുവരെയും ഫിറ്റ്നെസ്സ് ടെസ്റ്റിനു മുമ്പ് പരിശോധിച്ച് ഇവരുടെ പരിക്ക് ഭേദമാകില്ലെന്ന് അറിയിച്ചാല്‍ 29നു മുമ്പ് ഇന്ത്യയുടെ ടീം പ്രഖ്യാപനമുണ്ടാകുമെന്നും അറിയുന്നു.
