Author: Staff Reporter

സുരക്ഷാ പ്രശ്നങ്ങൾ ഉള്ള ഇന്ത്യയിൽ പര്യടനം നടത്താൻ ഇന്റർനാഷണൽ ക്രിക്കറ്റ് കൗൺസിൽ മറ്റു ടീമുകളെ അനുവദിക്കരുതെന്ന ആവശ്യവുമായി മുൻ പാകിസ്ഥാൻ താരം ജാവേദ് മിയാൻദാദ്. ഇന്ത്യയിൽ ഇപ്പോൾ നടന്നുകൊണ്ടിരിക്കുന്ന പൗരത്വ നിയമത്തിനെതിരെയുള്ള പ്രക്ഷോഭങ്ങൾ ചൂണ്ടിക്കാട്ടിയാണ് ഇന്ത്യയിൽ മറ്റു ടീമുകൾ പര്യടനം നടത്തുന്നത് തടയണമെന്ന ആവശ്യം മിയാൻദാദ് ഉന്നയിച്ചത്.

നേരത്തെ പാകിസ്ഥാൻ ക്രിക്കറ്റ് ബോർഡ് ചെയർമാൻ ഇഹ്‌സാൻ മാനിയും ഇതേ ആവശ്യം ഉന്നയിച്ച് രംഗത്തെത്തിയിരുന്നു. പാകിസ്ഥാനിൽ അല്ല ഇന്ത്യയിലാണ് ടൂറിസ്റ്റുകൾക്കും മറ്റും സുരക്ഷാ ഭീഷണി ഉള്ളതെന്നും മിയാൻദാദ് പറഞ്ഞു. ഒരു വ്യക്തി എന്ന നിലയിലും ഒരു സ്പോർട്സ് താരം എന്ന നിലയിലും ഞമ്മൾ എല്ലാം ഇതിനെതിരെ പ്രതികരിക്കണമെന്നും മിയാൻദാദ് പറഞ്ഞു.

“ലോകം മുഴുവൻ ഇന്ത്യയിൽ നടക്കുന്നത് കാണുകയും ചർച്ച ചെയ്യുകയും ചെയ്യുന്നുണ്ട്. ഞാൻ പാകിസ്ഥാനിൽ ഉള്ള എല്ലാവർക്കും വേണ്ടി പറയുകയാണ്. ഇന്ത്യയുമായുള്ള എല്ലാ കായിക ബന്ധങ്ങളും അവസാനിപ്പിക്കണം. എല്ലാ രാജ്യങ്ങളും ഇന്ത്യക്കെതിരെ നടപടിയെടുക്കണം” മിയാൻദാദ് പറഞ്ഞു.

ഹിന്ദുവായത് കൊണ്ട് പാകിസ്ഥാൻ താരമായിരുന്ന ഡാനിഷ് കനേരിയയോട് മറ്റു പാകിസ്ഥാൻ താരങ്ങൾ മോശമായാണ് പെരുമാറിയെന്ന വെളിപ്പെടുത്തലുമായി പാകിസ്ഥാൻ ഫാസ്റ്റ് ബൗളർ ഷൊഹൈബ് അക്തർ. താരത്തിനൊപ്പം ഭക്ഷണം കഴിക്കാൻ പോലും പല താരങ്ങളും വിസമ്മതിച്ചിരുന്നതായി ഷൊഹൈബ് അക്തർ വെളിപ്പെടുത്തി.

ഷൊഹൈബ് അക്തറുടെ വെളിപ്പെടുത്തലിന് പിന്നാലെ ഈ സംഭവങ്ങൾ എല്ലാം സത്യമാണെന്ന് ഡാനിഷ് കനേരിയ പ്രതികരിച്ചു. അന്ന് തനിക്ക് ഇതിനെതിരെ പ്രതികരിക്കാനുള്ള ധൈര്യം ഉണ്ടായിരുന്നില്ലെന്നും ഹിന്ദു ആയതുകൊണ്ട് മാത്രം തന്നോട് സംസാരിക്കാതിരുന്ന താരങ്ങളുടെ പേരുകൾ താൻ വെളിപ്പെടുത്തുമെന്നും താരം പറഞ്ഞു.

ഷൊഹൈബ് അക്തറും ഇൻസമമുൽ ഹഖും മുഹമ്മദ് യൂസഫും യൂനിസ് ഖാനും തന്നെ ഇപ്പോഴും പിന്തുണച്ചിരുന്നുവെന്നും കനേരിയ വെളിപ്പെടുത്തി. 62 ടെസ്റ്റ് മത്സരങ്ങൾ പാകിസ്ഥാന് വേണ്ടി കളിച്ച കനേരിയ 261 വിക്കറ്റുകളും വീഴ്ത്തിയിട്ടുണ്ട്. പാകിസ്ഥാൻ ക്രിക്കറ്റ് ടീമിൽ കളിക്കുന്ന രണ്ടാമത്തെ ഹിന്ദു മത വിശ്വാസിയാണ് ഡാനിഷ് കനേരിയ.

ന്യൂസിലാൻഡിനെതിരായ ബോക്സിങ് ഡേ ടെസ്റ്റിന്റെ രണ്ടാം ദിവസം ലഞ്ചിന് പിരിയുമ്പോൾ ഓസ്ട്രേലിയ ശക്തമായ നിലയിൽ. നിലവിൽ ഓസ്ട്രേലിയ 5 വിക്കറ്റ് നഷ്ടത്തിൽ 336 റൺസ് എടുത്തിട്ടുണ്ട്. രണ്ടാം ദിവസത്തെ ആദ്യ സെഷനിൽ 85 റൺസ് എടുത്ത സ്റ്റീവ് സ്മിത്തിന്റെ വിക്കറ്റാണ് ഓസ്‌ട്രേലിയക്ക് നഷ്ടമായത്.

വാഗ്നറുടെ പന്തിൽ നിക്കോളാസ് മനോഹരമായ ഒരു ക്യാച്ചിലൂടെയാണ് സ്മിത്തിനെ പുറത്താക്കിയത്. നിലവിൽ 57 റൺസ് എടുത്ത ട്രാവിസ് ഹെഡും 33 റൺസ് എടുത്ത ടിം പെയ്‌നുമാണ് ക്രീസിൽ ഉള്ളത്. ടെസ്റ്റിന്റെ ഒന്നാം ദിവസം 63 റൺസ് എടുത്ത ലബുഷെയിനും 41 റൺസ് എടുത്ത ഡേവിഡ് വാർണറും 38 റൺസ് മാത്യു വാഡേയും ഓസ്ട്രേലിയയുടെ സ്കോർ ഉയർത്തിയത്.

ടെസ്റ്റ് ക്രിക്കറ്റിൽ 150 മത്സരങ്ങൾ കളിക്കുന്ന ആദ്യ ഫാസ്റ്റ് ബൗളറായി ഇംഗ്ലണ്ട് ഫാസ്റ്റ് ബൗളർ ജെയിംസ് ആൻഡേഴ്സൺ. ദക്ഷിണാഫ്രിക്കക്കെതിരെയുള്ള ഒന്നാം ക്രിക്കറ്റ് ടെസ്റ്റിൽ ഇംഗ്ലണ്ടിന് വേണ്ടി കളിക്കാൻ ഇറങ്ങിയതോടെയാണ് താരം ഈ നേട്ടം സ്വന്തമാക്കിയത്. 135 മത്സരങ്ങൾ കളിച്ച മറ്റൊരു ഇംഗ്ലണ്ട് താരമായ സ്റ്റുവർട്ട് ബ്രോഡ് ആണ് ഫാസ്റ്റ് ബൗളർമാരിൽ ഏറ്റവും കൂടുതൽ ടെസ്റ്റ് മത്സരങ്ങൾ കളിച്ചവരിൽ രണ്ടാം രണ്ടാം സ്ഥാനത്ത് ഉള്ളത്.

ദീർഘ കാലത്തെ പരിക്കിന് ശേഷമാണ് ജെയിംസ് ആൻഡേഴ്സൺ ഇംഗ്ലണ്ട് ടീമിൽ തിരിച്ചെത്തിയത്. കഴിഞ്ഞ ആഷസ് പരമ്പരയിൽ ഇംഗ്ലണ്ടിന് വേണ്ടി കളിക്കാൻ ഇറങ്ങിയ ആൻഡേഴ്സൺ നാല് ഓവർ ബൗൾ ചെയ്തതിന് ശേഷം പരിക്ക് മൂലം മത്സരം പൂർത്തിയാക്കിയിരുന്നില്ല. തുടർന്ന് ഇന്നാണ് ആൻഡേഴ്സൺ ഇംഗ്ലണ്ടിന് വേണ്ടി കളിച്ചത്.  മത്സരത്തിലെ ആദ്യ ബൗളിൽ തന്നെ ഡീൻ എൻഗറുടെ വിക്കറ്റ് ജെയിംസ് ആൻഡേഴ്സൺ വീഴ്ത്തുകയും ചെയ്തിരുന്നു.