Author: Newsroom

അഹമ്മദാബാദ് : 23 വയസ്സിൽ താഴെയുള്ളവർക്കായുള്ള ദേശീയ ഏകദിന ക്രിക്കറ്റ് ടൂർണ്ണമെൻ്റിൽ കേരളത്തിന് സൌരാഷ്ട്രയോട് തോൽവി. മൂന്ന് വിക്കറ്റിനായിരുന്നു സൌരാഷ്ട്രയുടെ വിജയം. ആദ്യം ബാറ്റ് ചെയ്ത കേരളം 50 ഓവറിൽ എട്ട് വിക്കറ്റ് നഷ്ടത്തിൽ 280 റൺസെടുത്തു. മറുപടി ബാറ്റിങ്ങിന് ഇറങ്ങിയ സൌരാഷ്ട്ര എട്ട് പന്തുകൾ ബാക്കി നില്ക്കെ ലക്ഷ്യത്തിലെത്തി. ക്വിൻഷ് പദാലിയയുടെ ഓൾ റൌണ്ട് പ്രകടനമാണ് സൌരാഷ്ട്രയ്ക്ക് വിജയം ഒരുക്കിയത്.

ടോസ് നേടിയ സൌരാഷ്ട്ര കേരളത്തെ ആദ്യം ബാറ്റ് ചെയ്യാൻ അയയ്ക്കുകയായിരുന്നു. 21 റൺസെടുത്ത ഒമർ അബൂബക്കറുടെ വിക്കറ്റാണ് കേരളത്തിന് ആദ്യം നഷ്ടമായത്. തുടർന്നെത്തിയ കൃഷ്ണ നാരായൺ അഞ്ചും ഷോൺ റോജർ ഒൻപതും രോഹൻ നായർ 15ഉം റൺസെടുത്ത് പുറത്തായി. ഒരറ്റത്ത് വിക്കറ്റുകൾ മുറയ്ക്ക് വീഴുമ്പോഴും മറുവശത്ത് ഉറച്ച് നിന്ന അഭിഷേക് ജെ നായരുടെ പ്രകടനമാണ് കേരളത്തിന് കരുത്ത് പകർന്നത്. അഭിഷേക് 100 റൺസെടുത്തു. 11 ഫോറും ഒരു സിക്സുമടങ്ങുന്നതായിരുന്നു അഭിഷേകിൻ്റെ സെഞ്ച്വറി. പവൻ ശ്രീധറും ക്യാപ്റ്റൻ അഭിജിത് പ്രവീണും അഭിഷേകിന് മികച്ച പിന്തുണ നല്കി. ഇരുവർക്കുമൊപ്പം അഭിഷേക് 56 റൺസിൻ്റെ കൂട്ടുകെട്ടുണ്ടാക്കി. പവൻ ശ്രീധർ 32 റൺസ് നേടിയപ്പോൾ അഭിജിത് പ്രവീൺ 61 റൺസുമായി പുറത്താകാതെ നിന്നു. 53 പന്തുകളിൽ ആറ് ഫോറും രണ്ട് സിക്സുമടക്കമായിരുന്നു അഭിജിത് 61 റൺസ് നേടിയത്. സൌരാഷ്ട്രയ്ക്ക് വേണ്ടി ക്വിൻഷ് പദാലിയ, മക്വാന ഹിരെൻ, ക്രെയിൻസ് ഫുലേത്ര എന്നിവർ രണ്ട് വിക്കറ്റ് വീതം വീഴ്ത്തി.

മറുപടി ബാറ്റിങ്ങിന് ഇറങ്ങിയ സൌരാഷ്ട്രയ്ക്ക് നാല് റൺസെടുക്കുന്നതിനിടെ രണ്ട് വിക്കറ്റ് നഷ്ടമായി. രാജ് വഗേലയെയും ധ്യേയ് മേത്തയെയും പുറത്താക്കി ആദിത്യ ബൈജുവാണ് കേരളത്തിന് മികച്ച തുടക്കം നല്കിയത്. ക്യാപ്റ്റൻ രക്ഷിത് മേത്തയും രാംദേവും ചേർന്ന മൂന്നാം വിക്കറ്റ് കൂട്ടുകെട്ടാണ് സൌരാഷ്ട്രയെ കരകയറ്റിയത്. ഇരുവരും ചേർന്ന് 106 റൺസ് കൂട്ടിച്ചേർത്തു. 54 റൺസെടുത്ത രാംദേവിനെ പുറത്താക്കി ക്യാപ്റ്റൻ അഭിജിത് പ്രവീൺ കേരളത്തിന് പ്രതീക്ഷ നല്കി. രക്ഷിത് മേത്തയെ ആദിത്യ ബൈജുവും പുറത്താക്കിയതോടെ കളി കേരളത്തിൻ്റെ വരുതിയിലെന്ന് തോന്നിച്ച ഘട്ടത്തിലാണ് ക്വിൻഷ് പദാലിയ ക്രീസിലെത്തിയത്. സമ്മർദ്ദ ഘട്ടത്തിലും ഒരറ്റത്ത് ഉറച്ച് നിന്ന് അനായാസ ഷോട്ടുകൾ പായിച്ച പദാലിയ ഒറ്റയ്ക്ക് മത്സരത്തിൻ്റെ ഗതി മാറ്റുകയായിരുന്നു. മൌര്യ ഗൊഘാറിയും ക്രെയിൻസ് ഫുലേത്രയും മികച്ച പിന്തുണ നല്കിയതോടെ 48.4 ഓവറിൽ സൌരാഷ്ട്ര ലക്ഷ്യത്തിലെത്തി. 52 പന്തുകളിൽ അഞ്ച് ഫോറും നാല് സിക്സുമടക്കം 73 റൺസുമായി പദാലിയ പുറത്താകാതെ നിന്നു. കേരളത്തിന് വേണ്ടി ആദിത്യ ബൈജു മൂന്ന് വിക്കറ്റുകൾ വീഴ്ത്തി.

ഹോങ്കോങ് സിക്‌സസ് 2025-ലെ ഇന്ത്യയുടെ പോരാട്ടം ഒരു ജയത്തിന് ശേഷം തുടർച്ചയായ നാല് തോൽവികളോടെ നിരാശാജനകമായി അവസാനിച്ചു. ദിനേശ് കാർത്തിക്കിന്റെ നേതൃത്വത്തിലുള്ള ഇന്ത്യൻ ടീം തങ്ങളുടെ അവസാന മത്സരത്തിൽ ശ്രീലങ്കയോട് 48 റൺസിന് പരാജയപ്പെട്ടു. ഇതിന് മുൻപ് കുവൈറ്റ്, യു.എ.ഇ., നേപ്പാൾ എന്നീ ടീമുകളോടും ഇന്ത്യ തോൽവി ഏറ്റുവാങ്ങിയിരുന്നു. ഓരോ ടീമിനും ആറ് ഓവറുകൾ വീതം ലഭിക്കുന്ന ഈ അതിവേഗ ഫോർമാറ്റിൽ സ്ഥിരത നിലനിർത്താൻ ഇന്ത്യൻ ടീം നന്നായി പ്രയാസപ്പെടുന്നതാണ് ടൂർണമെന്റിൽ കണ്ടത്.

ശ്രീലങ്കയുമായുള്ള അവസാന മത്സരത്തിൽ, ആറ് ഓവറിൽ ഇന്ത്യ 138 റൺസ് വഴങ്ങി. മറുപടി ബാറ്റിങ്ങിൽ ഇന്ത്യൻ ടീമിന് ആറ് വിക്കറ്റ് നഷ്ടത്തിൽ 90 റൺസ് മാത്രമാണ് നേടാനായത്. ഭരത് ചിപ്ലിയുടെ 13 പന്തിൽ 41 റൺസും, സബ്‌സ്റ്റിറ്റ്യൂട്ട് ക്യാപ്റ്റനായ സ്റ്റുവർട്ട് ബിന്നിയുടെ പുറത്താകാതെ 9 പന്തിൽ 25 റൺസും ഇന്ത്യക്ക് തുണയായില്ല.

ടൂർണമെന്റിലെ മറ്റു മത്സരങ്ങളിൽ, കുവൈറ്റിന്റെ യാഷിൻ പട്ടേൽ നടത്തിയ വെടിക്കെട്ട് ബാറ്റിംഗ് ഇന്ത്യയിൽ നിന്ന് മത്സരങ്ങൾ അകറ്റി. നേപ്പാളിനെതിരായ മത്സരത്തിൽ വിക്കറ്റ് നഷ്ടപ്പെടാതെ 137 റൺസാണ് നേപ്പാൾ നേടിയത്. ഈ മത്സരത്തിൽ മറുപടി ബാറ്റിങ്ങിനിറങ്ങിയ ഇന്ത്യ 45 റൺസിന് ഓൾ ഔട്ടാകുകയും ചെയ്തു. പാകിസ്ഥാനെതിരെ നേരിയ വിജയത്തോടെ ടൂർണമെന്റ് തുടങ്ങിയെങ്കിലും, സിക്‌സസ് ഫോർമാറ്റിന്റെ അപ്രവചനീയതയും തീവ്രമായ സമ്മർദ്ദവും കാരണം ഇന്ത്യക്ക് ആ ഫോം നിലനിർത്താനായില്ല.