മെല്‍ബേണ്‍ സ്റ്റാര്‍സിനെതിരെ മികച്ച വിജയം സ്വന്തമാക്കാനായെങ്കിലും ടൂര്‍ണ്ണമെന്റിലെ തങ്ങളുടെ രണ്ടാം വിജയം മാത്രം കുറിച്ച പെര്‍ത്തിനു പോയിന്റ് പട്ടികയിലെ അവസാന സ്ഥാനത്ത് നിന്ന് മോചനമില്ല. ഇന്നലെ നടന്ന മത്സരത്തില്‍ മെല്‍ബേണ്‍ സ്റ്റാര്‍സിനെയാണ് പെര്‍ത്ത് സ്കോര്‍ച്ചേര്‍സ് 6 വിക്കറ്റിനു പരാജയപ്പെടുത്തിയത്. ആദ്യം ബാറ്റ് ചെയ്ത മെല്‍േബണ്‍ സ്റ്റാര്‍സ് 6 വിക്കറ്റ് നഷ്ടത്തില്‍ 146 റണ്‍സ് നേടിയപ്പോള്‍ പെര്‍ത്ത് 4 വിക്കറ്റുകളുടെ നഷ്ടത്തില്‍ 17.4 ഓവറില്‍ വിജയം കുറിച്ചു.
നാല് വിക്കറ്റ് വീഴ്ത്തി പെര്‍ത്തിനായി തിളങ്ങിയ ആന്‍ഡ്രൂ ടൈ ആണ് കളിയിലെ താരം. 4 ഓവറില്‍ 18 റണ്‍സ് മാത്രമാണ് ടൈ നല്‍കിയത്. 62 റണ്‍സ് നേടിയ ബെന്‍ ഡങ്കിനൊപ്പം ഓപ്പണര്‍ ഇവാന്‍ ഗുല്‍ബിസ് 37 റണ്‍സ് നേടിയപ്പോള്‍ ഒന്നാം വിക്കറ്റില്‍ സ്റ്റാര്‍സ് 65 റണ്‍സ് നേടി. തുടര്‍ന്ന് ബെന്‍ ഡങ്ക് കൂടി പുറത്തായതോടെ ടീമിന്റെ ഇന്നിംഗ്സ് ആടി ഉലയുകയായിരുന്നു.
നായകന്‍ ആഷ്ടണ്‍ ടര്‍ണര്‍ 22 പന്തില്‍ 43 റണ്‍സ് നേടി പുറത്താകാതെ ടീമിന്റെ വിജയം ഉറപ്പാക്കിയപ്പോള്‍ കാമറൂണ്‍ ബാന്‍ക്രോഫ്ട് 59 റണ്‍സ് നേടി ടീമിന്റെ ടോപ് സ്കോറര്‍ ആയി. മൈക്കല്‍ ക്ലിംഗര്‍ 29 റണ്‍സും നേടി. ഡ്വെയിന്‍ ബ്രാവോ സ്റ്റാര്‍സിനായി രണ്ട് വിക്കറ്റ് നേടി.
