തെലുഗു ടൈറ്റന്‍സിനെതിരെ 4 പോയിന്റ് വിജയം നേടി തമിഴ് തലൈവാസ്. ഇന്ന് നടന്ന ആദ്യ മത്സരത്തില്‍ 27-23 എന്ന സ്കോറിനായിരുന്നു ടീമിന്റെ വിജയം. ആദ്യ പകുതിയില്‍ 8 പോയിന്റ് ലീഡോടു കൂടി 18-10നു തലൈവാസ് മുന്നിട്ട് നിന്നുവെങ്കിലും രണ്ടാം പകുതിയില്‍ ടൈറ്റന്‍സ് മെച്ചപ്പെട്ട പ്രകടനം പുറത്തെടുക്കുകയായിരുന്നു. എന്നാല്‍ ലീഡ് നില കുറച്ച് കൊണ്ടുവരാനായെങ്കിലും ജയം നേടുവാന്‍ രാഹുല്‍ ചൗധരിയുടെ ടീമിനു സാധിച്ചില്ല.
8 പോയിന്റ് നേടി അജയ് താക്കൂര്‍ തലൈവാസിനും രാഹുല്‍ ചൗധരി ടൈറ്റന്‍സിനു വേണ്ടിയും തിളങ്ങിയ മത്സരത്തില്‍ റെയിഡിംഗില്‍ ഇരു ടീമുകളും 15 പോയിന്റുമായി ഒപ്പം പാലിച്ചു. 9-7 എന്ന സ്കോറിനു പ്രതിരോധ പോയിന്റുകളില്‍ മുന്നിട്ട് നിന്നത് തമിഴ് തലൈവാസായിരുന്നു. ഒരു തവണ ടൈറ്റന്‍സിനെ ഓള്‍ഔട്ട് ആക്കുവാനും തലൈവാസിനു സാധിച്ചു.
