പാക് ഫീല്‍ഡര്‍മാര്‍ നല്‍കിയ അവസരം മുതലാക്കി തന്റെ 19ാം ഏകദിന ശതകം നേടുന്നതിനിടെ ഒട്ടനവധി നേട്ടങ്ങളാണ് രോഹിത് ശര്‍മ്മ ഇന്ന് സ്വന്തമാക്കിയത്. 119 പന്തില്‍ നിന്ന് 111 റണ്‍സ് താരം നേടിയപ്പോള്‍ ഏകദിനത്തിലെ ഏഴായിരം റണ്‍സ് കൂടി ഇന്ന് പൂര്‍ത്തിയാക്കുവാന്‍ രോഹിത്തിനായി. 7 ബൗണ്ടറിയും 4 സിക്സുമടങ്ങിയ ഇന്നിംഗ്സിനിടെ ഏഴായിരം റണ്‍സ് പൂര്‍ത്തിയാക്കുന്ന അഞ്ചാമത്തെ വേഗതയേറിയ താരമായി രോഹിത് മാറി. 181 ഇന്നിംഗ്സില്‍ നിന്നാണ് താരത്തിന്റെ ഈ നേട്ടം.
301 ഇന്നിംഗ്സില്‍ നിന്ന് അന്താരാഷ്ട്ര ക്രിക്കറ്റില്‍ 300 സിക്സ് നേടുന്ന വേഗതയേറിയ താരം കൂടിയായി രോഹിത്ത് ഇന്നത്തെ പ്രകടനത്തിലൂടെ. തുടര്‍ച്ചയായ മൂന്നാം തവണയാണ് ടൂര്‍ണ്ണമെന്റില്‍ 50ലധികം റണ്‍സ് രോഹിത് ശര്‍മ്മ നേടിയത്. ഇത് വഴി ഈ നേട്ടം ഏഷ്യ കപ്പില്‍ നേടുന്ന രണ്ടാമത്തെ ക്യാപ്റ്റനായും രോഹിത് മാറി.
