ന്യൂസിലൻഡിനെതിരായ ഏകദിന പരമ്പരയ്ക്ക് മുന്നോടിയായി വിരാട് കോഹ്ലി ആഭ്യന്തര ക്രിക്കറ്റിൽ ഒരു മത്സരം കൂടെ കളിക്കും. ജനുവരി 6-ന് ബംഗളൂരു ആലൂരിലെ കെ.എസ്.സി.എ ഗ്രൗണ്ടിൽ റെയിൽവേയ്ക്കെതിരെ നടക്കുന്ന വിജയ് ഹസാരെ ട്രോഫി മത്സരത്തിൽ കോഹ്ലി ഡൽഹിക്ക് വേണ്ടി കളിക്കുമെന്ന് ഡിഡിസിഎ (DDCA) ഉദ്യോഗസ്ഥർ സ്ഥിരീകരിച്ചു.
ഈ സീസണിൽ നേരത്തെ നടന്ന രണ്ട് മത്സരങ്ങളിലും കോഹ്ലി തകർപ്പൻ ഫോമിലായിരുന്നു. ആന്ധ്രയ്ക്കെതിരെ 101 പന്തിൽ 131 റൺസും ഗുജറാത്തിനെതിരെ 61 പന്തിൽ 77 റൺസും താരം അടിച്ചുകൂട്ടിയിരുന്നു. സൂപ്പർ താരത്തിന്റെ സാന്നിധ്യം ഡൽഹി ടീമിന്റെ ആത്മവിശ്വാസം വലിയ തോതിൽ വർദ്ധിപ്പിക്കും. ജനുവരി 11-ന് ആരംഭിക്കുന്ന ഇന്ത്യ-ന്യൂസിലൻഡ് ഏകദിന പരമ്പരയ്ക്ക് മുൻപ് ബാറ്റിംഗിലെ കൃത്യതയും ഫോമും നിലനിർത്താൻ ഈ മത്സരം കോഹ്ലിയെ സഹായിക്കും.
റെയിൽവേയ്ക്കെതിരായ മത്സരത്തിന് തൊട്ടുപിന്നാലെ ജനുവരി 7-ന് കോഹ്ലി ഇന്ത്യൻ ഏകദിന ടീമിനൊപ്പം ചേരും. വഡോദരയിലാണ് ഇന്ത്യൻ താരങ്ങൾ ഒത്തുകൂടുന്നത്. ജനുവരി 11-ന് വഡോദരയിൽ തുടങ്ങുന്ന പരമ്പരയിലെ മറ്റ് മത്സരങ്ങൾ രാജ്ക്കോട്ട്, ഇൻഡോർ എന്നിവിടങ്ങളിലായാണ് നടക്കുക. കരിയറിന്റെ ഈ ഘട്ടത്തിലും ആഭ്യന്തര ക്രിക്കറ്റിൽ കളിക്കാൻ കാണിക്കുന്ന താല്പര്യം യുവതാരങ്ങൾക്ക് വലിയ പ്രചോദനമാണ്.
