ആദ്യ റൗണ്ടിൽ അനായാസ ജയവുമായി ഇറ്റലിയുടെ ലോക ഒന്നാം നമ്പർ യാനിക് സിന്നർ വിംബിൾഡൺ രണ്ടാം റൗണ്ടിൽ. നാട്ടുകാരനായ സീഡ് ചെയ്യാത്ത ലൂക്ക നാർഡിയെ 6-4, 6-3, 6-0 എന്ന നേരിട്ടുള്ള സെറ്റുകൾക്ക് ആണ് സിന്നർ തകർത്തത്. മത്സരത്തിൽ അതിഗംഭീര പ്രകടനം പുറത്തെടുത്ത സിന്നർ 5 തവണയാണ് എതിരാളിയുടെ സർവീസ് ബ്രേക്ക് ചെയ്തത്. 9 ഏസുകളും ഇറ്റാലിയൻ താരം മത്സരത്തിൽ ഉതിർത്തു.
അതേസമയം ഏഴാം സീഡ് ആയ ഇറ്റാലിയൻ താരം ലോറൻസോ മുസെറ്റി സീഡ് ചെയ്യാത്ത ജോർജിയൻ നിക്കോളാസ് ബാഷിലാശ്ലിയോട് നാലു സെറ്റ് പോരാട്ടത്തിൽ പരാജയപ്പെട്ടു ആദ്യ റൗണ്ടിൽ പുറത്തായി. 6-2, 4-6, 7-5, 6-1 എന്ന സ്കോറിന് ആണ് മുസെറ്റി പരാജയപ്പെട്ടത്. പുരുഷ സിംഗിൾസിൽ ഇത് വരെയുള്ള വലിയ അട്ടിമറിയാണ് ഇത്.
