ഇംഗ്ലീഷ് പ്രീമിയർ ലീഗിൽ കടുത്ത പ്രതിഷേധങ്ങൾക്ക് ഇടയാക്കിയ ആഴ്‌സണൽ യുവതാരം മൈൽസ് ലൂയിസ്-സ്‌കെല്ലിയുടെ ചുവപ്പ് കാർഡ് പിൻവലിച്ചു ഫുട്‌ബോൾ അസോസിയേഷൻ. കഴിഞ്ഞ മത്സരത്തിൽ വോൾവ്സിന് എതിരായ മത്സരത്തിൽ ആണ് റഫറി മൈക്കിൾ ഒളിവർ 18 കാരനായ ആഴ്‌സണൽ യുവതാരത്തിനു ചുവപ്പ് കാർഡ് നൽകിയത്. വോൾവ്സ് ബോക്സിനു അരികിൽ വെച്ചു വോൾവ്സ് മുന്നേറ്റം തടയാനായി ഡോഹർട്ടിയെ ടെക്നിക്കൽ ഫൗൾ ചെയ്ത സ്‌കെല്ലിക്ക് റഫറി ചുവപ്പ് കാർഡ് നൽകിയത് വലിയ വിവാദങ്ങൾക്ക് ആണ് തുടക്കം ഇട്ടത്. കളിക്കാർ പ്രതിഷേധിച്ചു എങ്കിലും വാർ ഈ തീരുമാനം പിൻവലിച്ചില്ല.
തുടർന്ന് മത്സരം 1 ഗോളിന് ആഴ്‌സണൽ ജയിച്ചെങ്കിലും തന്റെ നിരാശ പരിശീലകൻ മിഖേൽ ആർട്ടെറ്റ മത്സരശേഷം പരസ്യമാക്കിയിരുന്നു. ഈ തീരുമാനം പ്രീമിയർ ലീഗ് ഉടൻ പിൻവലിക്കും എന്നും ആർട്ടെറ്റ പറഞ്ഞിരുന്നു. തുടർന്ന് വലിയ പ്രതിഷേധം ആണ് ഫുട്‌ബോൾ ലോകത്ത് ഒന്നടങ്കം ഉണ്ടായത്. താൻ ജീവിതത്തിൽ കണ്ട ഏറ്റവും മോശം തീരുമാനം ആണ് ഇതെന്ന് പറഞ്ഞു അലൻ ഷിയറും, മൈക്ക റിച്ചാർഡ്സും അടക്കമുള്ള പണ്ഡിറ്റുകളും രംഗത്ത് വന്നു. ആഴ്‌സണലിന് എതിരായ മൈക്കിൾ ഒളിവറിന്റെ തുടർച്ചയായ മോശം റഫറിയിങിന് എതിരെ വലിയ ആരാധക പ്രതിഷേധവും അധിക്ഷേപങ്ങളും സാമൂഹിക മാധ്യമങ്ങളിൽ ഉണ്ടായി. തുടർന്ന് ഇതിനു എതിരെ റഫറിമാരുടെ സംഘടന രംഗത്ത് വരികയും പോലീസ് ചില ആരാധകർക്ക് എതിരെ കേസ് എടുക്കുകയും ചെയ്തു. തുടർന്ന് ഇന്ന് ആഴ്‌സണൽ നൽകിയ അപ്പീലിന് ശേഷം എഫ്.എ താരത്തിന്റെ ചുവപ്പ് കാർഡ് പിൻവലിച്ചത് ആയി പ്രഖ്യാപിക്കുകയും താരത്തിന്റെ മൂന്നു മത്സരങ്ങളിൽ നിന്നുള്ള വിലക്ക് നീക്കുകയും ആയിരുന്നു.
