ജർമ്മൻ ബുണ്ടസ് ലീഗയിൽ ജയം തുടർന്നു ബയേൺ മ്യൂണിക്. നിലവിൽ 9 മത്സരങ്ങൾക്ക് ശേഷം ഒന്നാം സ്ഥാനത്തും അവർ തുടരുകയാണ്. ആറാം സ്ഥാനക്കാർ ആയ യൂണിയൻ ബെർലിനെ എതിരില്ലാത്ത മൂന്നു ഗോളുകൾക്ക് ആണ് ബയേൺ സ്വന്തം മൈതാനത്ത് തോൽപ്പിച്ചത്. എതിരാളിയെ കരുതി കൂട്ടി പരിക്ക് ഏൽപ്പിക്കുന്നു എന്ന വിമർശനങ്ങൾ നേരിടുന്നതിന് ഇടയിൽ ഇരട്ട ഗോളുകൾ നേടിയ ഹാരി കെയിൻ ആണ് ബയേണിന്റെ വിജയ ശിൽപ്പി.
14 മത്തെ മിനിറ്റിൽ മൈക്കിൾ ഒലീസെ നേടി നൽകിയ പെനാൽട്ടി ലക്ഷ്യം കണ്ട ഹാരി കെയിൻ ബയേണിന് ആദ്യ ഗോൾ സമ്മാനിച്ചു. തുടർന്ന് 43 മത്തെ മിനിറ്റിൽ ഹാരി കെയിനിന്റെ പാസിൽ നിന്നു ഗോൾ കണ്ടെത്തിയ കിങ്സ്ലി കോമാൻ ബയേണിനു രണ്ടാം ഗോളും സമ്മാനിച്ചു. രണ്ടാം പകുതിയിൽ 51 മത്തെ മിനിറ്റിൽ കോമാന്റെ പാസിൽ നിന്നു ഗോൾ നേടിയ ഹാരി കെയിൻ ബയേണിന്റെ ജയം പൂർത്തിയാക്കി. സീസണിൽ ഇത് വരെ 11 ഗോളുകളും 5 അസിസ്റ്റുകളും ആണ് കെയിൻ ലീഗിൽ മാത്രം നേടിയത്.
