അമെക്സ് സ്റ്റേഡിയത്തിൽ നടന്ന ആവേശകരമായ പോരാട്ടത്തിൽ, ബ്രൈറ്റൺ ആൻഡ് ഹോവ് അൽബിയോണും വോൾവർഹാംപ്ടൺ വാണ്ടറേഴ്സും 2-2 സമനിലയിൽ പോയിൻ്റ് പങ്കിട്ടു. അവസാന മിനിറ്റുകളിൽ 2 ഗോളുകൾ നേടിയാണ് വോൾവ്‌സ് സമനില നേടിയത്.
45-ാം മിനിറ്റിൽ വെൽബെക്കിലൂടെയാണ് ബ്രൈറ്റൺ ലീഡ് എടുത്തത്. ജോർജിനിയോ റട്ടറിൻ്റെ അസിസ്റ്റിൽ നിന്നായിരുന്നു, വെൽബെക്കിന്റെ ഗോൾ. ഈ സീസണിലെ താരത്തിന്റെ ആറാം ഗോൾ ആയി ഇത്. 85-ാം മിനിറ്റിൽ താരിഖ് ലാംപ്‌റ്റെയിൽ നിന്ന് പാസ് സ്വീകരിച്ച് ഇവാൻ ഫെർഗൂസൺ നേടിയ ഗോൾ ബ്രൈറ്റണെ 2-0ന് മുന്നിൽ എത്തിച്ചു.
അവർ 3 പോയിന്റ് ഉറപ്പാക്കി എന്ന് കരുതിയ സമയത്തായിരുന്നു വോൾവ്സിന്റെ തിരിച്ചടി. 88-ാം മിനിറ്റിൽ റയാൻ എയ്റ്റ്-നൂറി തിരിച്ചടിച്ചു, സ്‌കോർ 2-1ലേക്ക് മാറി. തൊട്ടുപിന്നാലെ, അധിക സമയത്തിൻ്റെ മൂന്നാം മിനിറ്റിൽ, ടോമി ഡോയ്‌ലിൻ്റെ പാസ് സ്വീകരിച്ച് മുന്നേറിയ മാത്യൂസ് കൂഞ്ഞ്യ സമനില ഗോൾ നേടി, വോൾവ്‌സിന് സമനില ഉറപ്പിച്ചു.
