2023-24 സീസൺ അവസാനത്തോടെ തോമസ് ടുഷൽ ബയേൺ പരിശീലക സ്ഥാനം ഒഴിയും. ഇതു സംബന്ധിച്ച ഔദ്യോഗിക പ്രഖ്യാപനം ബയേൺ ഇന്ന് നടത്തി. ഈ സീസണിൽ കിരീട സാധ്യതയിൽ നിന്ന് അകലുന്ന ബയേണിന്റെ സമീപ കാലത്തെ പ്രകടനങ്ങൾ ഒട്ടും നല്ലതായിരുന്നില്ല. 2023 മാർച്ചിൽ ജൂലിയൻ നാഗെൽസ്മാനെ ബയേൺ പുറത്താക്കിയതിന് പിന്നാലെ ആയിരുന്നു ടൂഷലിന്റെ നിയമനം വന്നത്.
ചാമ്പ്യൻസ് ലീഗിൻ്റെ പ്രീക്വാർട്ടറിൽ കഴിഞ്ഞ ദിവസം 1-0 തോൽവി ബയേൺ ഏറ്റു വാങ്ങിയിരുന്നു. അവസാന മൂന്ന് മത്സരങ്ങളിലും ബയേൺ തോറ്റിരുന്നു. ബുണ്ടസ് ലീഗയിൽ ബയർ ലെവർകൂസന് എട്ട് പോയിന്റ് പിറകിലാണ് ഇപ്പോൾ ബയേൺ ഉള്ളത്. അടുത്ത സീസണ് മുന്നോടിയായി ബയേൺ പുതിയ പരിശീലകനെ പ്രഖ്യാപിക്കും. ലെവർകൂസന്റെ പരിശീലകനായ സാബി അലോൺസോയെ ആണ് ബയേൺ പരിശീലകനായി ലക്ഷ്യമിടുന്നത്
