2024ലെ ഓസ്‌ട്രേലിയൻ ഓപ്പണിൻ്റെ സെമി ഫൈനലിൽ ജർമ്മനിയുടെ അലക്‌സാണ്ടർ സ്വെരേവിനെ തോൽപിച്ച് ഡാനിയൽ മെദ്വദേവ് ഫൈനലിൽ. 2 സെറ്റുകൾക്ക് പിറകിൽ നിന്ന ശേഷമാണ് ഡാനിൽ മെദ്വദേവ് അവിശ്വസനീയമായ തിരിച്ചുവരവ് നടത്തിയത്. വെള്ളിയാഴ്ച റോഡ് ലേവർ അരീനയിൽ, മെദ്വദേവ് തൻ്റെ ജർമ്മൻ എതിരാളിയെ 5-7, 3-6, 7-6 (7-4), 7-6 (7-5), 6-3 എന്ന സ്കോറിനാണ് തോൽപ്പിച്ചത്. 4 മണിക്കൂർ 18 മിനിറ്റോളം പോരാട്ടം നീണ്ടു നിന്നു.
നേരത്തെ രണ്ടാം റൗണ്ടിൽ ഫിൻലൻഡിൻ്റെ എമിൽ റുസുവോറിയെക്ക് എതിരെയും മെദ്വദേവ് 2-0ന് പിറകിലായ ശേഷം തിരിച്ചടിച്ച് വിജയിച്ചിരുന്നു. അന്ന് 3-6, 6-7 (1-7), 6-4, 7-6 (7-1), 6-0 എന്ന സ്‌കോറിനായിരുന്നു ജയം.
10 തവണ ചാമ്പ്യനായ നൊവാക് ജോക്കോവിച്ചിനെ പുറത്താക്കിയ ഇറ്റലിയുടെ ജാനിക് സിന്നറെയാണ് മെദ്വദേവ് ഫൈനലിൽ നേരിടുക.
