കലിംഗ സൂപ്പർ കപ്പിൽ മുംബൈ സിറ്റിയെ തോൽപ്പിച്ച് ഒഡീഷ എഫ്സി ഫൈനലിൽ. ഇന്ന് നടന്ന രണ്ടാം സെമിഫൈനലിൽ മറുപടിയില്ലാത്ത ഏക ഗോളിനാണ് ഒഡീഷ ശക്തരായ മുംബൈ സിറ്റിയെ തോൽപ്പിച്ചത്. ആദ്യ പകുതിയിൽ ഇരു ടീമുകളും നിരവധി അവസരങ്ങൾ സൃഷ്ടിച്ചിരുന്നു എങ്കിലും അവസാനം 44 ആം മിനിറ്റിൽ ഒരു പെനാൽറ്റിയിലൂടെയാണ് ഒഡീഷ ഗോൾ നേടിയത്.
പെനാൽറ്റിയെടുത്ത മൊറീസിയോ ലക്ഷ്യം തെറ്റാതെ പന്ത് വലയിൽ എത്തിച്ചതോടെ ആദ്യ പകുതി ഒഡീഷ 1-0ന്റെ ലീഡിൽ അവസാനിപ്പിച്ചു. രണ്ടാം പകുതിയിൽ മുംബൈ സിറ്റി സമനിലക്ക് വേണ്ടി ഏറെ പരിശ്രമിച്ചുവെങ്കിലും ഗോൾ ഒന്നും വന്നില്ല. കളിയുടെ അവസാന നിമിഷങ്ങളിൽ മുംബൈ സിറ്റിയുടെ രണ്ട് താരങ്ങൾ ചുവപ്പ് കണ്ട് പുറത്തായി. നിലവിലെ സൂപ്പർ കപ്പ് ചാമ്പ്യന്മാരായ ഒഡീഷ ഇനി കിരീടം നിലനിർത്താനായി ഫൈനലിൽ ഈസ്റ്റ് ബംഗാളിനെ നേരിടും. കഴിഞ്ഞദിവസം നടന്ന ആദ്യ സെമിഫൈനലിൽ ഈസ്റ്റ് ബംഗാൾ ജംഷദ്പൂരിനെ തോൽപ്പിച്ചായിരുന്നു ഫൈനലിലേക്ക് മുന്നേറിയത്.
