ലയണൽ മെസ്സിയെ പരിശീലിപ്പിക്കാൻ മുൻ അർജന്റീന, ബാഴ്‌സലോണ പരിശീലകൻ ആയ ജെറാർഡോ മാർട്ടിനോ എത്തും. 60 കാരനായ മാർട്ടിനോയെ തങ്ങളുടെ പരിശീലകൻ ആയി നിയമിച്ചത് ആയി ലയണൽ മെസ്സിയുടെ പുതിയ ക്ലബ് ഇന്റർ മയാമി ഔദ്യോഗികമായി പ്രഖ്യാപിച്ചു.
വലിയ അനുഭവ പരിചയം ഉള്ള മാർട്ടിനോ മുമ്പ് അർജന്റീന, ബാഴ്‌സലോണ, മെക്സിക്കോ തുടങ്ങി നിരവധി ടീമുകളെ പരിശീലിപ്പിച്ചിട്ടുണ്ട്. കഴിഞ്ഞ ലോകകപ്പിൽ മെക്സിക്കോയുടെ പരിശീലകൻ ആയിരുന്നു അദ്ദേഹം. 2013-14 കാലത്ത് ബാഴ്‌സലോണയിലും 2014 മുതൽ 2016 വരെയുള്ള കാലത്ത് അർജന്റീനയിലും മെസ്സി മാർട്ടിനോക്ക് കീഴിൽ കളിച്ചിട്ടുണ്ട്. മേജർ ലീഗ് സോക്കറിൽ കൈ നോക്കാൻ ഇറങ്ങുന്ന മെസ്സിക്ക് ‘എൽ ടാറ്റ’ക്ക് കീഴിൽ അമേരിക്ക കീഴടക്കാൻ തന്നെ ആയേക്കും.
