യൂറോപ്പ ലീഗ് സെവിയ്യയുടെ സ്വന്തം ടൂർണമെന്റ് തന്നെ. അവർ ഒരിക്കൽ കൂടെ യൂറോപ്പ ലീഗ് ഫൈനലിലേക്ക് എത്തിയിരിക്കുകയാണ്. ഇന്ന് നടന്ന സെമി ഫൈനലിന്റെ രണ്ടാം പാദത്തിൽ 2-1ന് യുവന്റസിനെ തോൽപ്പിച്ചതോടെയാണ് സെവിയ്യ ഫൈനൽ ഉറപ്പിച്ചത്‌. ആദ്യ പാദം 1-1 എന്നായിരുന്നു അവസാനിച്ചത്. അഗ്രിഗേറ്റ് സ്കോർ 3-2ന് സെവിയ്യ വിജയിച്ചു. സെവിയ്യയുടെ ഏഴാം യൂറോപ്പ ലീഗ് ഫൈനൽ ആണിത്‌.
ഇന്ന് മത്സരത്തിന്റെ രണ്ടാം പകുതിയിൽ 65ആം മിനുട്ടിൽ വ്ലാഹോവിചിന്റെ ഗോളിലൂടെ യുവന്റസ് ആയിരുന്നു ലീഡ് എടുത്തത്. 71ആം മിനുട്ടിൽ സുസോയിലൂടെ അവർ തിരിച്ചടിച്ചു. സ്കോർ 1-1. തുടർന്ന് കളി എക്സ്ട്രാ ടൈമിൽ എത്തി. എക്സ്ട്രാ ടൈമിന്റെ ആദ്യ പകുതിയിൽ ലമേലയിലൂടെ സെവിയ്യക്ക് ലീഡ് നൽകിയ ഗോൾ. ഈ ഗോൾ വിജയ ഗോളായും മാറി.
ലെവർകൂസനെ തോൽപ്പിച്ച് ഫൈനൽ ഉറപ്പിച്ച റോമയാകും സെവിയ്യയുടെ ഫൈനലിലെ എതിരാളികൾ.
