ക്രിസ്റ്റ്യാനോ റൊണാൾഡോ വീണ്ടും ഇരട്ട ഗോളുകൾ നേടിയ മത്സരത്തിൽ പോർച്ചുഗലിന് വലിയ വിജയം. ഇന്ന് യൂറോ യോഗ്യത റൗണ്ടിലെ രണ്ടാം മത്സരത്തിൽ എവേ മത്സരത്തിൽ ലക്സംബർഗിനെ നേരിട്ട പോർച്ചുഗൽ എതിരില്ലാത്ത ആറ് ഗോളുകൾക്ക്‌ ആണ് വിജയിച്ചത്. മത്സരം ആരംഭിച്ച് ആദ്യ 31 മിനുട്ടുകളിൽ ത‌‌ന്നെ പോർച്ചുഗൽ 4 ഗോളിന് മുന്നിൽ എത്തിയിരുന്നു.
ഒമ്പതാം മിനുട്ടിൽ റൊണാൾഡോ ആണ് പോർച്ചുഗലിന്റെ ഗോളടി തുടങ്ങിയത്. ബ്രൂണോയുടെ ഒരു ക്രോസിൽ നിന്ന് വന്ന അവസരം റൊണാൾഡോ മുതലെടുക്കുക ആയിരുന്നു. 15ആം മിനുറ്റിൽ ബെർണാർഡോ സിൽവയുടെ ഒരു ക്രോസിൽ നിന്ന് കിടിലൻ ഹെഡറിലൂടെ ജാവോ ഫെലിക്സ് രണ്ടാം ഗോൾ നേടി.
19ആം മിനുട്ടിൽ ബെർണഡോ സിൽവയുടെ ഹെഡർ പോർച്ചുഗലിന് മൂന്നാം ഗോൾ നൽകി. 31ആം മിനുട്ടിൽ ബ്രൂണോയുടെ പാസ് സ്വീകരിച്ച് റൊണാൾഡോ തന്റെ രണ്ടാം ഗോൾ നേടി. അന്താരാഷ്ട്ര കരിയറിൽ 122ആം ഗോൾ. ആദ്യ പകുതി 4-0ന് അവസാനിച്ചു. രണ്ടാം പകുതിയിൽ സബ്ബായി എത്തിയ ഒറ്റാവിയയും ഗോൾ അടിച്ചു. ഇതോടെ പോർച്ചുഗൽ വിജയം ഉറപ്പിച്ചു. ആറാം ഗോൾ നേടാൻ ഒരു പെനാൾട്ടി പോർച്ചുഗലിന് ലഭിച്ചിരുന്നു. എന്നാൽ ലിയോ എടുത്ത പെനാൾട്ടി ലക്ഷ്യത്തിൽ എത്തിയില്ല. പെനാൾട്ടി നഷ്ടപ്പെടുത്തിയ ക്ഷീണം 89ആം മിനുട്ടിലെ ഒരു ഗോളിലൂടെ റാഫേൽ ലിയോ തീർത്തു.
