മാഞ്ചസ്റ്റർ യുണൈറ്റഡ് ഫുൾബാക്ക് ലൂക് ഷോയുടെ കരാർ ക്ലബ് ഉടൻ പുതുക്കും. അതിനായുള്ള ചർച്ചകൾ അന്തിമ ഘട്ടത്തിൽ എത്തി എന്ന് ഫുട്ബോൾ ഇൻസൈഡർ റിപ്പോർട്ട് ചെയ്യുന്നു. ഇനിയും 2 വർഷം ഷോയ്ക്ക് മാഞ്ചസ്റ്റർ യുണൈറ്റഡിൽ കരാർ ഉണ്ട്. എങ്കിലും അതിനു മുമ്പ് തന്നെ താരത്തിന് വലിയ കരാർ നൽകുക ആണ് ക്ലബിന്റെ ഉദ്ദേശം. 27കാരനായ താരം അദ്ദേഹത്തിന്റെ കരിയറിലെ ഏറ്റവും മികച്ച ഫോമിലാണ് ഉള്ളത്. ഈ സീസണിൽ മാഞ്ചസ്റ്റർ യുണൈറ്റഡ് ഡിഫൻസിലെ പ്രധാനിയാണ് ലൂക് ഷോ.
ലെഫ്റ്റ് ബാക്കായും സെന്റർ ബാക്കായും ഇപ്പോൾ ഒരുപോലെ ലൂക് ഷോ യുണൈറ്റഡിനായി തിളങ്ങുന്നുണ്ട്‌. 2014 മുതൽ മാഞ്ചസ്റ്റർ യുണൈറ്റഡിൽ ഉള്ള താരമാണ് ലൂക് ഷോ. ആദ്യ സീസണുകളിൽ പരിക്ക് കാരണം ബുദ്ധിമുട്ടിയ ലൂക് ഷോ പക്ഷെ അവസാന 3 സീസണുകളിൽ യുണൈറ്റഡിനായി സ്ഥിരതയാർന്ന പ്രകടനമാണ് കാഴ്ചവെക്കുന്നത്‌. ഈ മാസം തന്നെ ലൂക് ഷോ പുതിയ കരാർ ഒപ്പുവെക്കും എന്നാണ് പ്രതീക്ഷിക്കപ്പെടുന്നത്. ഷോയെ കൂടാതെ, ഗർനാചൊ, റാഷ്ഫോർഡ്, ഡാലോട്ട് എന്നിവരെല്ലാം യുണൈറ്റഡിൽ കരാർ ഒപ്പുവെക്കുന്നതിന് അടുത്താണ്‌.
