സ്പാനിഷ് വെറ്ററൻ താരം സെർജിയോ ബുസ്കെറ്റ്സ് ബാഴ്സലോണ വിടുന്നു. പുറത്ത് വരുന്ന വാർത്തകൾ അനുസരിച്ച് ബുസ്കെറ്റ്സ് 2023ൽ ബാഴ്സലോണ വിടും. എം.എൽ.എസിലേക്കാണ് ബുസ്കെറ്റ്സ് പോവുന്നതെന്നാണ് റിപ്പോർട്ടുകൾ. പരിശീലകൻ സാവിക്ക് ബുസ്കെറ്റ്സ് ബാഴ്സലോണയിൽ തുടരുന്നതാണ് താത്പര്യമെങ്കിലും പുതിയ കരാർ നൽകാൻ തീരുമാനമായിട്ടില്ല. ശമ്പള ബില്ല് കുറക്കുന്നതിനായുള്ള പദ്ധതിയുടെ ഭാഗമായി ബാഴ്സലോണ താരത്തിന്റെ മേജർ ലീഗ് സോക്കർ എൻട്രിക്ക് അനുമതി കൊടുക്കും. ഇന്റർ മിയാമിയാണ് താരത്തിനായി രംഗത്തുള്ളതെന്നാണ് റിപ്പോർട്ടുകൾ.
എന്രിക്വെയുടെ സ്പാനിഷ് ലോകകപ്പ് സ്ക്വാഡിലെ വെറ്ററൻ സാന്നിധ്യമാണ് ബുസ്കെറ്റ്സ്. 34കാരനായ ബുസ്കെറ്റ്സ് സ്പാനിഷ് ദേശീയ ടീമിനോടൊപ്പം ലോകകപ്പും യൂറോപ്യൻ ചാമ്പ്യൻഷിപ്പും നേടിയിട്ടുണ്ട് . ബാഴ്സലോണയുടെ അക്കാദമി താരമായ ബുസ്കെറ്റ്സ്, മൂന്ന് ചാമ്പ്യൻസ് ലീഗ് കിരീടങ്ങളും എട്ട് ലാലീഗ കിരീടവും നേടിയിട്ടുണ്ട്.
