ഡൂറണ്ട് കപ്പിൽ ബെംഗളൂരു എഫ് സി ഫൈനലിൽ. ഐ എസ് എൽ ചാമ്പ്യന്മാരായ ഹൈദരാബാദ് എഫ് സിയെ തോൽപ്പിച്ച് ആണ് ബെംഗളൂരു ഫൈനലിലേക്ക് മുന്നേറിയത്. മത്സരത്തിന്റെ ആദ്യ പകുതിയിൽ പിറന്ന ഒരു ഗോളിന്റെ ബലത്തിൽ 1-0ന്റെ വിജയമാണ് ബെംഗളൂരു എഫ് സി നേടിയത്. ഒരു സെൽഫ് ഗോളിൽ നിന്നായിരുന്നു ബെംഗളൂരു എഫ് സി ലീഡ് നേടിയത്.
31ആം മിനുട്ടിൽ വലതു വിങ്ങിൽ നിന്ന് പ്രബീർ ദാസ് നൽകിയ ക്രോസ് സബാല സ്വന്തം പോസ്റ്റിലേക്ക് തന്നെ എത്തിക്കുക ആയിരുന്നു. ഈ ഗോളിന് മറുപടി നൽകാൻ ഹൈദരാബാദ് എഫ് സി ഏറെ ശ്രമിച്ചു എങ്കിലും ഫലം ഉണ്ടായില്ല. മികച്ച ഡിഫൻസീവ് സെറ്റപ്പ് കാത്തു സൂക്ഷിച്ച ബെംഗളൂരു ഫൈനൽ ഉറപ്പിക്കുകയായിരുന്നു.
മുംബൈ സിറ്റിയെ ആകും ബെംഗളൂരു ഫൈനലിൽ നേരിടുക. ഇന്നലെ മൊഹമ്മദൻസിനെ തോൽപ്പിച്ച് ആയിരുന്നു മുംബൈ സിറ്റി ഫൈനലിലേക്ക് എത്തിയത്. 18ആം തീയതി ആണ് ഫൈനൽ നടക്കുക.
