ലോക ടെസ്റ്റ് ചാമ്പ്യൻഷിപ്പ് ഫൈനലിൽ മുൻതൂക്കം ന്യൂസിലാണ്ടിന് എന്ന് പറഞ്ഞ് ഇന്ത്യൻ പേസർ മുഹമ്മദ് ഷമി. ജൂൺ 18ന് ന്യൂസിലാണ്ടിനെതിരെ സൌത്താംപ്ടണിൽ ഫൈനലിനിറങ്ങുമ്പോൾ ന്യൂസിലാണ്ടിനാവും നേരത്തെ എത്തിയതിന്റെയും ഇംഗ്ലണ്ടിനെതിരെ ഏതാനും ടെസ്റ്റുകൾ കളിച്ചതിന്റെയും മുൻതൂക്കമെന്നും ഇംഗ്ലണ്ടിലെ സാഹചര്യങ്ങളുമായി നേരത്തെ പൊരുത്തപ്പെട്ടതിന്റെ ആനുകൂല്യം അവർക്ക് ഉണ്ടാകുമെന്നും ഷമി പറഞ്ഞു.
എന്നാൽ ഇന്ത്യ ഏറെ വർഷങ്ങളായി ഒരു സംഘമെന്ന നിലയിൽ വളരെ മികച്ച പ്രകടനമാണ് പുറത്തെടുക്കുന്നതെന്നും അതിനാൽ തന്നെ കിരീടം സ്വന്തമാക്കുവാനാകുമെന്ന വിശ്വാസം ടീമിനുണ്ടെന്നും മുഹമ്മദ് ഷമി വ്യക്തമാക്കി. മുൻതൂക്കം ഉണ്ടെങ്കിലും ഫൈനൽ പോലൊരു സ്റ്റേജിൽ ഏറ്റവും കുറവ് പിഴവുകൾ വരുത്തുന്ന ടീമുകളാവും വിജയിക്കുക എന്ന് ഷമി പറഞ്ഞു.
ഇന്ത്യയും ന്യൂസിലാണ്ടും മുൻ നിര ടീമുകളാണെന്നും ഇരുവർക്കും ഹോം അഡ്വാന്റേജ് ഈ ഫൈനൽ മത്സരത്തിനില്ലെന്നതും പ്രത്യേകം ഓർക്കേണ്ട കാര്യമാണെന്നും ഷമി സൂചിപ്പിച്ചു. കൃത്യമായി കാര്യങ്ങളും സ്കില്ലും ഉപയോഗിക്കുന്ന ടീമിനൊപ്പം വിജയം ഉണ്ടാകുമെന്നും ഷമി വ്യക്തമാക്കി.
