ഐ എസ് എല്ലിൽ എത്തിയിട്ട് ആദ്യ വിജയത്തിനായി ഈസ്റ്റ് ബംഗാൾ കാത്തിരിക്കാൻ തുടങ്ങിയിട്ട് കാലം കുറച്ചായി. സീസണിലെ എട്ടാം മത്സരത്തിലാണ് റോബി ഫൗളറിന്റെ ടീം വിജയം കണ്ടെത്തിയിരിക്കുന്നത്. ലീഗിൽ ഏറ്റവും മോശം ഫോമുള്ള ഒഡീഷ എഫ് സിയെ ആണ് ഈസ്റ്റ് ബംഗാൾ പരാജയപ്പെടുത്തിയിരിക്കുന്നത്‌. ഒന്നിനെതിരെ മൂന്നു ഗോളുകൾക്കായിരുന്നു ഈസ്റ്റ് ബംഗാളിന്റെ വിജയം.
ആദ്യ പകുതിയിലാണ് ഈസ്റ്റ് ബംഗാളിന്റെ രണ്ടു ഗോളുകൾ വന്നത്. 12ആം മിനുട്ടിൽ രാജു ഗെയ്ക്വാദിന്റെ ഒരു ലോംഗ് ത്രോ ആണ് ഈസ്റ്റ് ബംഗാളിന് ലീഡ് നൽകിയത്. രാജുവിന്റെ ത്രോയിൽ നിന്ന് പിൽകിങ്ടൺ ആണ് ഗോൾ കണ്ടെത്തിയത്. പിൽകിങ്ടന്റെ ഈസ്റ്റ് ബംഗാളിനായുള്ള ആദ്യ ഗോളായിരുന്നു ഇത്. 39ആം മിനുട്ടിലാണ് രണ്ടാം ഗോൾ വന്നത്. ഇടതു വിങ്ങിലൂടെ കുതിച്ച് കയറിയ മഗോമ ആണ് ഗംഭീര ഫിനിഷിലൂടെ ഗോൾ കണ്ടെത്തിയത്. താരത്തിന്റെ സീസണിലെ മൂന്നാം ഗോളായിരുന്നു ഇത്.
77ആം മിനുട്ടിൽ എനൊബകേരെ ബ്രൈറ്റ് ഈസ്റ്റ് ബംഗാളിന്റെ വിജയം ഉറപ്പിച്ച മൂന്നാം ഗോളും നേടി. മൊറിസിയോ ആണ് ഒഡീഷയുടെ ആശ്വാസ ഗോൾ നേടിയത്‌. ഈ വിജയത്തോടെ ഈസ്റ്റ് ബംഗാളിന് ലീഗിൽ എട്ടു മത്സരങ്ങളിൽ നിന്ന് ആറു പോയിന്റായി. അവർ ലീഗിൽ കേരള ബ്ലാസ്റ്റേഴ്സിന്റെ മറികടന്ന ഒമ്പതാം സ്ഥാനത്ത് എത്തി. ഒരു ജയം പോലും ഇല്ലാത്ത ഒഡീഷ അവസാന സ്ഥാനത്താണ്.
