ഐ എസ് എല്ലിൽ ഇന്ന് കേരള ബ്ലാസ്റ്റേഴ്സ് വീണ്ടും ഇറങ്ങുകയാണ്. ലീഗിലെ രണ്ടാം വിജയമാണ് കേരള ബ്ലാസ്റ്റേഴ്സ് ലക്ഷ്യം ഇടുന്നത്. അവസാന മത്സരത്തിൽ ഹൈദരാബാദിനെ തോൽപ്പിച്ച കേരള ബ്ലാസ്റ്റേഴ്സിന് ഇന്ന് പക്ഷെ ചെറിയ എതിരാളികൾ ഒന്നുമല്ല. ലീഗിൽ രണ്ടാമത് നിൽക്കുന്ന മുംബൈ സിറ്റിയാണ് ഇന്ന് കേരള ബ്ലാസ്റ്റേഴ്സിന് എതിരായി വരുന്നത്. അവസാന ആറു മത്സരത്തിൽ പരാജയം അറിയാതെ നിൽക്കുന്ന ടീമാണ് മുംബൈ സിറ്റി.
സെർജിയോ ലൊബേരയുടെ ടീമിനെതിരെ ഇതുവരെ വിജയിക്കാൻ ആയിട്ടില്ലാത് ടീമാണ് കേരള ബ്ലാസ്റ്റേഴ്സ്. എഫ് സി ഗോവയിലായിരിക്കെ ആറു തവണ കേരള ബ്ലാസ്റ്റേഴ്സിനെ നേരിട്ട ലൊബേര അഞ്ചു തവണയും വിജയിച്ചിരുന്നു. ഒരു സമനില മാത്രമാണ് കേരള ബ്ലാസ്റ്റേഴ്സിന് ലൊബേരയ്ക്ക് എതിരെ ഇതുവരെ നേടാൻ ആയ പോയിന്റ്. ഇന്ന് പക്ഷെ കേരള ബ്ലാസ്റ്റേഴ്സ് വിജയത്തിന് വേണ്ടി മാത്രമാകും ലക്ഷ്യം വെക്കുക.
കിബു വികൂന ഇന്ന് ഏത് ലൈനപ്പ് ആകും ഇറക്കുക എന്നതാകും എല്ലാവരും ഉറ്റു നോക്കുക. അവസാന മത്സരത്തിൽ ഹൈദരബാദിനെതിരെ ഇന്ത്യൻ സെന്റർ ബാക്കുകളെ ഇറക്കി വികുന എല്ലാവരെയും ഞെട്ടിച്ചിരുന്നു. ആ ഡിഫൻസ് കൂട്ടുകെട്ട് തുടരുമോ എന്നത് കണ്ട് അറിയേണ്ടി വരും. മികച്ച ഫോമിൽ ഉള്ള ജോർദൻ മറെ തന്നെയാകും ഇന്ന് കേരള ബ്ലാസ്റ്റേഴ്സിന്റെ അറ്റാക്ക് നയിക്കുക. ഇന്ന് രാത്രി 7.30നാണ് മത്സരം നടക്കുക.
