ബിഗ് ബാഷില്‍ ഇന്ന് മെല്‍ബേണ്‍ സ്റ്റാര്‍സിന് വിജയം. ബ്രിസ്ബെയിന് ഹീറ്റിനെ 125 റണ്‍സിന് ഓള്‍ഔട്ട് ആക്കിയ ശേഷം മെല്‍ബേണ്‍ സ്റ്റാര്‍സ് 4 വിക്കറ്റ് നഷ്ടത്തില്‍ 17.1 ഓവറില്‍ വിജയം കരസ്ഥമാക്കുകയായിരുന്നു. 26 പന്തില്‍ 46 റണ്‍സ് നേടിയ ഗ്ലെന്‍ മാക്സ്വെല്‍, 46 റണ്‍സുമായി പുറത്താകാതെ നിന്ന ഹില്‍ട്ടണ്‍ കാര്‍ട്റൈറ്റ് എന്നിവരാണ് മെല്‍ബേണിന്റെ വിജയം ഒരുക്കിയത്. ബ്രിസ്ബെയിന് വേണ്ടി ജാക്ക് വുഡ് രണ്ട് വിക്കറ്റ് നേടി.
നേരത്തെ ആദ്യം ബാറ്റ് ചെയ്ത ഹീറ്റ് 19.5 ഓവറില്‍ ഓള്‍ഔട്ട് ആകുകയായിരുന്നു. ടോം കൂപ്പര്‍ 26 റണ്‍സുമായി ടോപ് സ്കോറര്‍ ആയപ്പോള്‍ മാക്സ് ബ്രയന്റ്(20), ക്രിസ് ലിന്‍(20) എന്നിവര്‍ മാത്രമാണ് 20 റണ്‍സെന്ന നേട്ടം സ്വന്തമാക്കിയ താരങ്ങള്‍. മൂന്ന് താരങ്ങള്‍ റണ്ണൗട്ട് രീതിയില്‍ പുറത്തായപ്പോള്‍ നഥാന്‍ കോള്‍ട്ടര്‍-നൈല്‍ നാല് വിക്കറ്റ് നേടി. തന്റെ 3.5 ഓവറില്‍ താരം വെറും 10 റണ്‍സാണ് വിട്ട് നല്‍കിയത്. ദില്‍ബര്‍ ഹുസൈന് രണ്ട് വിക്കറ്റ് ലഭിച്ചു.
