ഇംഗ്ലണ്ട് പര്യടനത്തിനിടെ ശവസംസ്കാര ചടങ്ങിൽ പങ്കെടുത്തതിന് വെസ്റ്റിൻഡീസ് പരിശീലകൻ ഫിൽ സിമ്മൺസിനെ പുറത്താക്കില്ലെന്ന് വെസ്റ്റിൻഡീസ് ക്രിക്കറ്റ് ബോർഡ്. നേരത്തെ ശവസംസ്കാര ചടങ്ങിൽ പങ്കെടുത്തതിന്റെ പേരിൽ സിമ്മൺസിനെ പുറത്താക്കണമെന്ന് ബാർബഡോസ് ക്രിക്കറ്റ് അസോസിയേഷൻ മേധാവി കൊണ്ടേ റൈലി ആവശ്യപ്പെട്ടിരുന്നു.
ഇതിനു പിന്നാലെയാണ് സിമ്മൺസിന് പിന്തുണയുമായി വെസ്റ്റിൻഡീസ് ക്രിക്കറ്റ് ബോർഡ് രംഗത്തെത്തിയത്. നിലവിൽ വെസ്റ്റിൻഡീസ് ക്രിക്കറ്റ് ടീമിനെ മുന്നോട്ട് നയിക്കാൻ എന്ത്കൊണ്ടും യോഗ്യൻ ഫിൽ സിമ്മൺസ് ആണെന്നും വെസ്റ്റിൻഡീസ് ക്രിക്കറ്റ് ബോർഡ് പറഞ്ഞു. ശവസംസ്കാര ചടങ്ങിൽ പങ്കെടുത്തതിന് പിന്നാലെ താരം ഓൾഡ് ട്രാഫോർഡിലെ ഹോട്ടലിൽ സെൽഫ് ഐസൊലേഷനിലാണ്.
നിലവിൽ ഐസൊലേഷനിൽ ഉള്ള സിമ്മൺസിന്റെ രണ്ട് കോവിഡ്-19 ടെസ്റ്റുകൾ നടത്തുകയും നെഗറ്റീവ് ആവുകയും ചെയ്തിട്ടുണ്ട്. അടുത്ത ആഴ്ച ഒരു ടെസ്റ്റ് കൂടി നടത്തി നെഗറ്റീവ് ആയതിന് ശേഷം താരം ടീമിനൊപ്പം ചേരുമെന്നാണ് കരുതപ്പെടുന്നത്.
