ന്യൂസിലാൻഡിനെതിരായ അഞ്ചാം ടി20യിൽ നാണക്കേടിന്റെ റെക്കോർഡ് സ്വന്തമാക്കി ഇന്ത്യൻ ബൗളർ ശിവം ഡുബെ. ന്യൂസിലാൻഡിനെതിരെ ഒരു ഓവറിൽ 34 റൺസ് വഴങ്ങിയ ഡുബെ ടി20യിൽ ഏറ്റവും കൂടുതൽ റൺസ് വഴങ്ങിയ ഇന്ത്യൻ താരമെന്ന നാണക്കേടിന്റെ റെക്കോർഡ് സ്വന്തമാക്കി. ഒരു ഓവറിൽ 34 റൺസ് വഴങ്ങിയ ശിവം ഡുബെ തുടർന്ന് ഇന്ത്യക്ക് വേണ്ടി പന്തെറിഞ്ഞിരുന്നില്ല.
ഇന്ത്യയുടെ പത്താം ഓവർ എറിയാൻ വന്ന ഡുബെ ആ ഓവറിൽ നാല് സിക്‌സും രണ്ടു ഫോറും ഒരു നോ ബോളും അടക്കമാണ് 34 റൺസ് നൽകിയത്. ന്യൂസിലാൻഡ് താരം സെയ്ഫെർട്ട് 17 റൺസും റോസ് ടെയ്‌ലർ 16 റൺസുമാണ് ഡുബെയുടെ പന്തിൽ നേടിയത്.
അന്തർദേശീയ ടി20 മത്സരങ്ങളിൽ ഏറ്റവും കൂടുതൽ റൺസ് വഴങ്ങിയ രണ്ടാമത്തെ താരം കൂടിയാണ് ഡുബെ. 2007 ടി20 ലോകകപ്പിൽ ഒരു ഓവറിൽ ആറ് സിക്സുകൾ അടക്കം 36 റൺസ് വഴങ്ങിയ ഇംഗ്ലണ്ട് താരം സ്റ്റുവർട്ട് ബ്രോഡ് ആണ് ഈ ലിസ്റ്റിൽ ഒന്നാമത്. അന്ന് ഇന്ത്യൻ താരം യുവരാജ് സിങ് ആണ് ബ്രോഡിനെതിരെ ഒരു ഓവറിൽ 6 സിക്സുകൾ നേടിയത്. ഇത്രയും കാലം ഒരു ഇന്ത്യൻ താരം ഏറ്റവും കൂടുതൽ റൺസ് വഴങ്ങിയത് 2016 ലോകകപ്പിൽ ഒരു ഓവറിൽ 32 റൺസ് വഴങ്ങിയ സ്റ്റുവർട്ട് ബിന്നിയായിരുന്നു.
