ടി20യിൽ ഏറ്റവും കൂടുതൽ അർദ്ധ സെഞ്ചുറികൾ നേടിയ റെക്കോർഡ് ഇനി വിരാട് കോഹ്‌ലിക്ക് സ്വന്തം. വെസ്റ്റിൻഡീസിനെതിരായ ഒന്നാം ടി20യിൽ 50 പന്തിൽ 94 റൺസ് നേടിയ വിരാട് കോഹ്‌ലി ഇന്ത്യക്ക് 6 വിക്കറ്റ് ജയം നേടി തന്നിരുന്നു. 6 ബൗണ്ടറിയും 6 സിക്‌സും അടങ്ങുന്നതായിരുന്നു വിരാട് കോഹ്‌ലിയുടെ ഇന്നിംഗ്സ്. വെസ്റ്റിൻഡീസിനെതിരായ അർദ്ധ സെഞ്ചുറി ടി20യിൽ വിരാട് കോഹ്‌ലിയുടെ 23മത്തെ അർദ്ധ സെഞ്ചുറിയായിരുന്നു.
22 അർദ്ധ സെഞ്ചുറികൾ നേടിയ ഇന്ത്യൻ ഓപണർ രോഹിത് ശർമ്മയുടെ റെക്കോർഡാണ് ഇതോടെ വിരാട് കോഹ്‌ലി മറികടന്നത്. മത്സരത്തിൽ ഓപ്പണറായി ഇറങ്ങിയ രോഹിത് ശർമ്മക്ക് 8 റൺസ് മാത്രമേ എടുക്കാനായുള്ളു. രോഹിത് ശർമ്മയെ കൂടാതെ 17 അർദ്ധ സെഞ്ചുറികൾ നേടിയ മാർട്ടിൻ ഗുപ്റ്റിലും 16 അർദ്ധ സെഞ്ചുറികൾ വീതം നേടിയ പോൾ സ്റ്റെർലിംഗും ഡേവിഡ് വാർണറുമാണ് ഏറ്റവും കൂടുതൽ അർദ്ധ സെഞ്ചുറികൾ നേടിയവരുടെ പട്ടികയിൽ ഉള്ളത്.
