റാഞ്ചിയിൽ രണ്ടാം ദിനത്തിൽ 497 റൺസ് അടിച്ച് ഇന്ത്യ ആദ്യ ഇന്നിംഗ്സ് അവസാനിപ്പിച്ചു. 9 വിക്കറ്റ് നഷ്ടത്തിലാണ് ടീം ഇന്ത്യ 497 റൺസ് എടുത്തത്. രോഹിത്ത് ശർമ്മയുടെ തകർപ്പ ബാറ്റിംഗ് പ്രകടനത്തിന്റെ ബലത്തിലാണ് ഇന്ത്യ 497 അടിച്ച് കൂട്ടിയത്. 255 പന്തില്‍ നിന്ന് 212 റണ്‍സെടുത്താണ് രോഹിത് പുറത്തായത്. ടെസ്റ്റില്‍ രോഹിതിന്റെ ആദ്യ ഡബിള്‍ സെഞ്ചുറിയാണിത്.
ഇന്ന് കളി തുടങ്ങിയപ്പോൾ 115 റണ്‍സ് നേടിയ അജിങ്ക്യ രഹാനെയുടെ വിക്കറ്റാണ് ഇന്ത്യയ്ക്ക് നഷ്ടമായത്. നാലാം വിക്കറ്റില്‍ 267 റണ്‍സ് കൂട്ടിചേര്‍ത്താണ് മികച്ച നിലയിലേക്ക് രോഹിത്-രഹാനെ കൂട്ടുകെട്ട് ഇന്ത്യയെ മുന്നോട്ട് നയിച്ചത്. ജോര്‍ജ്ജ് ലിന്‍ഡേയ്ക്കാണ് രഹാനെയുടെ വിക്കറ്റ്. രഹാനെക്ക് പിന്നാലെ ഇരട്ട ശതകം തികച്ച രോഹിത്തും പോയി. അതിനുശേഷം ഇന്ത്യൻ ഇന്നിംഗ്സ് ഉയർത്താൻ ഒരറ്റത്ത് ഉറച്ച് നിന്നത് ജഡേജയാണ്. ലിൻഡേക്ക് വിക്കറ്റ് നൽകി 24 റൺസെടുത്ത സാഹ ആദ്യം പുറത്തായി.
ജഡേജ 51 റൺസ് എടുത്ത് പുറത്തായി. അശ്വിൻ 14 റൺസെടുത്തും ഉമേശ് യാദവ് അഞ്ച് സിക്സടിച്ച് ആവേശമുയർത്തി 31 റൺസിനും കളം വിട്ടു. ക്യാപ്റ്റൻ കൊഹ്ലി ഇന്നിംഗ്സ് അവസാനിപ്പിക്കുമ്പോൾ 10 റൺസെടുത്ത് ഷമിയും 2 റണ്ണുമായി നദീമുമായിരുന്നു കളത്തിൽ.
