അലൈസ ഹീലിയുടെ അര്‍ദ്ധ ശതക പ്രകടനത്തിന്റെ ബലത്തില്‍ ടി20 പരമ്പര സ്വന്തമാക്കി ഓസ്ട്രേലിയ. ഇന്നലെ നടന്ന മത്സരത്തില്‍ ആദ്യം ബാറ്റ് ചെയ്ത വെസ്റ്റിന്‍ഡീസ് വനിതകള്‍ 9 വിക്കറ്റ് നഷ്ടത്തില്‍ 97 റണ്‍സാണ് നേടിയത്. 39 റണ്‍സ് നേടിയ ബ്രിട്നീ കൂപ്പറിനും 21 റണ്‍സ് നേടി പുറത്താകാതെ ചിനെല്ലേ ഹെന്‍റിയും മാത്രമാണ് വിന്‍ഡീസ് നിരയില്‍ പൊരുതി നോക്കിയത്. മൂന്ന് താരങ്ങള്‍ റണ്ണൗട്ടായതും വിന്‍ഡീസിന്റെ ബാറ്റിംഗിനെ സാരമായി ബാധിച്ചു. ജെസ്സ് ജോനാസ്സെന്‍ ഓസീസ് വനിതകളില്‍ രണ്ട് വിക്കറ്റുമായി തിളങ്ങി.
മറുപടി ബാറ്റിംഗിനിറങ്ങിയ ഓസ്ട്രേലിയയ്ക്ക് ബെത്ത് മൂണിയെ നേരത്തെ നഷ്ടമായെങ്കിലും അലൈസ ഹീലി അര്‍ദ്ധ ശതകവുമായി നിലയുറപ്പിച്ചപ്പോള്‍ 14.3 ഓവറില്‍ 9 വിക്കറ്റ് വിജയം ഓസ്ട്രേലിയ കരസ്ഥമാക്കി. 58 റണ്‍സ് നേടിയ ഹീലിയ്ക്കൊപ്പം 22 റണ്‍സുമായി മെഗ് ലാന്നിംഗും വിജയ സമയത്ത് ക്രീസിലുണ്ടായിരുന്നു.
