ഇന്ത്യയുടെ ബാറ്റിംഗിലെ അവസാന 10 ഓവറില്‍ നേടിയ 120 റണ്‍സാണ് മത്സരഗതി മാറ്റിയെതെന്ന് പറഞ്ഞ് ഓസ്ട്രേലിയന്‍ നായകന്‍ ആരോണ്‍ ഫിഞ്ച്. ഇന്നലെ ഓസ്ട്രേലിയയുടെ ഇന്ത്യയ്ക്കെതിരെയുള്ള 36 റണ്‍സിന്റെ പരാജയത്തിനു ശേഷം പ്രതികരിക്കുകയായിരുന്നു ആരോണ്‍ ഫിഞ്ച്. ഇന്ത്യയുടെ ബാറ്റിംഗിനു വലിയ ആഴമുണ്ടെന്നും വിക്കറ്റുകള്‍ നേടുവാനാകാതെ പോയതും ഓസ്ട്രേലിയയ്ക്ക് തിരിച്ചടിയായെന്ന് ഫിഞ്ച് പറഞ്ഞു. ഞങ്ങളെ മറ്റൊരു ടീം തീര്‍ത്തും നിഷ്പ്രഭമാക്കിയ ഒരു ദിവസമാണെന്നും എന്നാല്‍ അത് സ്ഥിരമാകില്ലെന്നും ഫിഞ്ച് പറഞ്ഞു.
അവസാന ഓവറുകളില്‍ ടീം ബൗളിംഗില്‍ മികവ് പുലര്‍ത്തിയില്ലെന്നും ഇത്തരം ഒരു ബാറ്റിംഗ് ലൈനപ്പിനെതിരെ കൂടുതല്‍ മികവാര്‍ന്ന പ്രകടനമാണ് പുറത്തെടുക്കേണ്ടതെന്നും ഫിഞ്ച് പറഞ്ഞു.
