ഐപിഎലില്‍ റോയല്‍ ചലഞ്ചേഴ്സ് ബാംഗ്ലൂരിനു വേണ്ടി ടൂര്‍ണ്ണമെന്റ് മദ്ധ്യേ എത്തി രണ്ട് മത്സരങ്ങള്‍ കളിച്ചുവെങ്കിലും പരിക്കേറ്റ് ഡെയില്‍ സ്റ്റെയിന്‍ വീണ്ടും മടങ്ങിയപ്പോള്‍ തിരിച്ചടിയായി മാറിയത് ആര്‍സിബിയ്ക്ക് മാത്രമല്ല ദക്ഷിണാഫ്രിക്കയ്ക്ക് കൂടിയാണ്. നിലവില്‍ ആന്‍റിച്ച് നോര്‍ട്ജേ പരിക്കേറ്റ് പുറത്തായ സാഹചര്യം ടീമില്‍ നിലനില്‍ക്കെയാണ് കാഗിസോ റബാഡയും ഡെയില്‍ സ്റ്റെയിനും പരിക്കിന്റെ പിടിയിലാകുന്നത്.
റബാഡ തിരികെ എത്തുമെന്ന ദക്ഷിണാഫ്രിക്ക പ്രതീക്ഷ വയ്ക്കുന്നത് പോലെ തന്നെ സ്റ്റെയിനും മികച്ച പ്രതികരണങ്ങളാണ് ചികിത്സയ്ക്ക് കാണിയ്ക്കുന്നതെന്നാണ് ടീമിന്റെ ഡോക്ടര്‍ പറയുന്നത്. സ്റ്റെയിന്‍ ചികിത്സയോട് മികച്ച രീതിയില്‍ പ്രതികരിക്കുന്നുണ്ടെന്നും കാര്യങ്ങള്‍ മെച്ചപ്പെട്ട് വരികയാണെന്നുമാണ് ടീം വൃത്തങ്ങള്‍ അറിയിക്കുന്നത്. ദേശീയ ക്യാമ്പ് ആരംഭിയ്ക്കുന്നതിനു മുമ്പ് സ്റ്റെയിനിന്റെ ആരോഗ്യസ്ഥിതിയെക്കുറിച്ചുള്ള അവലോകനം നടത്തിയ ശേഷം മാത്രമേ കൃത്യമായൊരു തീരുമാനം ഇക്കാര്യത്തില്‍ എടുക്കാനാകൂ എന്നാണ് ദക്ഷിണാഫ്രിക്കന്‍ വൃത്തങ്ങള്‍ അറിയിക്കുന്നത്.
