ഫ്രാൻസിൽ കിരീടം നേടിയ പി എസ് ജി തങ്ങളുടെ മോശം ഫോം തുടരുകയാണ്. ഇന്ന് ലീഗിൽ സ്വന്തം സ്റ്റേഡിയത്തിൽ നടന്ന മത്സരത്തിൽ നീസ് ആണ് പി എസ് ജിയെ സമനിലയിൽ പിടിച്ചത്. മത്സരം 1-1 എന്ന നിലയിലാണ് അവസാനിച്ചത്. നെയ്മറുടെ ഗോളാണ് പരാജയത്തിലേക്ക് നീങ്ങുകയായിരുന്ന പി എസ് ജിയെ രക്ഷിച്ചത്. നെയ്മറിന്റെ പി എസ് ജിക്ക് വേണ്ടിയുള്ള 50ആം ഗോളായിരുന്നു ഇത്.
57 മത്സരങ്ങളിൽ നിന്നാണ് പി എസ് ജിക്കായി നെയ്മർ 50 ഗോളുകൾ തികച്ചത്. ഈ സീസണിൽ പി എസ് ജിക്കായി നെയ്മർ നേടുന്ന 14ആം ഗോളുമായിരുന്നു ഇത്. പരിക്ക് ആണ് നെയ്മറിന്റെ ഈ സീസണിലെ ഗോളുകളുടെ എണ്ണം കുറയാൻ കാരണം. അവസാന ഏഴു മത്സരങ്ങൾക്ക് ഇടയിൽ പി എസ് ജി ആകെ ഒരു മത്സരമാണ് വിജയിച്ചത്.
