ജോസ് ബട്‍ലറെ മങ്കാഡെഡ് ചെയ്ത പുറത്താക്കിയ രവിചന്ദ്രന്‍ അശ്വിന്റെ നടപടിയെ ക്രിക്കറ്റ് ലോകം വിലയിരുത്തട്ടെ എന്ന് അഭിപ്രായപ്പെട്ട് രാജസ്ഥാന്‍ കോച്ച് പാഡി അപ്ടണ്‍. സംഭവത്തെ മറന്ന് ടീമെന്ന നിലയില്‍ ഒറ്റക്കെട്ടായി മുന്നോട്ട് പോകുവാനാണ് രാജസ്ഥാന്‍ തീരുമാനിച്ചത്. അതിനാല്‍ തന്നെ ഇതിന്മേല്‍ കൂടുതല്‍ പ്രതികരണത്തിനില്ലെന്നും പാഡി അപ്ടണ്‍ പറഞ്ഞു.
ഐപിഎല്‍ ആരാധകര്‍ക്കും ക്രിക്കറ്റ് ലോകത്തിനു ഈ വിഷയത്തെ ഞങ്ങള്‍ വിട്ട് നല്‍കുകയാണ്. അവര്‍ക്ക് ഉചിതമെന്ന് തോന്നുന്ന നിലപാട് ഈ വിഷയത്തില്‍ അവര്‍ കൈക്കൊള്ളട്ടേയെന്നും പാഡി വ്യക്തമാക്കി. ഐപിഎലില്‍ ഇനി കൂടുതല്‍ ടീമുകള്‍ ഈ വിഷയത്തെ ഗഹനമായി തന്നെ വിലയിരുത്തുമെന്നാണ് തനിക്ക് തോന്നുന്നതെന്ന് പറഞ്ഞ പാഡി ഐപിഎല്‍ തുടര്‍ന്നും അതിന്റെ ശരിയായ സ്പിരിറ്റില്‍ മുന്നോട്ട് പോകുമെന്ന് ആഗ്രഹം പ്രകടിപ്പിച്ചു.
വിവാദങ്ങള്‍ക്കല്ല ഞങ്ങള്‍ എല്ലാവരും ഇവിടെ ക്രിക്കറ്റിനെ ആസ്വദിക്കാനാണ് എത്തുന്നത്. ഗ്രൗണ്ടിലെത്തുന്ന ഓരോ കാണികളുടെയും ആഗ്രഹം അവര്‍ക്ക് മികച്ച ക്രിക്കറ്റ് കാണാനാകണം എന്നതാണെന്നും പാഡി അപ്ടണ്‍ പറഞ്ഞു.
