ഇക്കൊല്ലത്തെ തൃശൂർ വെറ്ററൻസ് ടെന്നീസ് ടൂർണമെന്റിന് നാളെ തുടക്കമാകും. ഹൈകോടതി ജസ്റ്റിസ് മുഹമ്മദ് നിയാസ് ഇന്ന് വൈകിട്ട് ഏഴ് മണിക്ക് തൃശൂർ ടെന്നീസ് ട്രസ്റ്റ് അങ്കണത്തിൽ വച്ച് ടൂർണമെന്റ് ഉത്ഘാടനം ചെയ്യും. ഈയ്യിടെ അന്തരിച്ച, നല്ലൊരു ടെന്നീസ് കളിക്കാരിയും, സംഘാടകയുമായിരുന്ന അഡ്വക്കേറ്റ് പുഷ്ക്കല ബഷീറിന്റെ ഓർമ്മക്കായി അഡ്വക്കേറ്റ് പുഷ്കല മെമ്മോറിയൽ വെറ്ററൻസ് ടെന്നീസ് ടൂർണമെന്റ് എന്ന് നാമകരണം ചെയ്യപ്പെട്ടിട്ടുള്ള ഇത്തവണത്തെ ടൂർണമെന്റിൽ പങ്കെടുക്കാൻ കേരളത്തിലെ എല്ലാ ജില്ലകളിലും നിന്നും നൂറോളം കളിക്കാർ വരുന്നതായിരിക്കും എന്ന് സംഘാടകർ അറിയിച്ചു.
ഡിസംബർ 10, 11 തിയ്യതികളിൽ നടക്കുന്ന മത്സരങ്ങൾ തൃശൂർ ടെന്നീസ് ട്രസ്റ്റിന്റെ കീഴിലുള്ള കിണറ്റിങ്കൽ ടെന്നീസ് കോർട്ടിൽ വച്ചാണ് തൃശൂർ ടെന്നീസ് അസോസിയേഷൻ സംഘടിപ്പിക്കുന്നത്. വനിതകൾക്കും പുരുഷൻമാർക്കും വെവ്വേറെ ഒരുക്കുന്ന മത്സരങ്ങളിൽ 35+, 45+, 55+, 65+ എന്നീ വിഭാഗങ്ങളിലാണ് കളിക്കാർ മാറ്റുരക്കുക.
കേരള ടെന്നീസ് ചരിത്രത്തിൽ എന്നും വാശിയേറിയ മത്സരങ്ങൾ നടക്കുന്ന വെറ്ററൻസ് ടെന്നീസ് ടൂർണമെന്റിൽ പങ്കെടുക്കാൻ ഇത്തവണ സാധാരണയിൽ കവിഞ്ഞുള്ള തിരക്കുണ്ടെന്ന് ഭാരവാഹികൾ പറഞ്ഞു. സംസ്ഥാന ടെന്നീസിലെ വന്മരങ്ങൾ പങ്കെടുക്കുന്ന ഈ മത്സര വേദി, കേരളത്തിലെ ടെന്നീസിനെ നയിക്കുന്നവരുടെയും, അഭ്യുതകാംഷികളുടെയും ഒരു സമ്മേളന വേദി കൂടിയാകും. ടെന്നിസിന് മാർഗ്ഗനിർദ്ദേശം നൽകി പോന്നിരുന്നവരുടെ അനൗദ്യോഗിക കൂടിക്കാഴ്ചകളിൽ, ടെന്നിസിന് ഗുണകരമാകുന്ന തീരുമാനങ്ങൾ ഉണ്ടാകും എന്നാണ് പ്രതീക്ഷ. ടെന്നീസ് എന്ന ഈ മനോഹര ഗെയിമിനെ ഇപ്പോഴത്തെ സംവിധാനങ്ങളിലും, ചട്ടക്കൂടുകളിലും തളച്ചിടാതെ, കൂടുതൽ ജനകീയവൽക്കരിക്കാൻ ഉതകുന്ന അഭിപ്രായങ്ങൾ ഉയർന്നു വരും എന്നാണ് പറയപ്പെടുന്നത്. തൃശൂരിൽ എത്തുന്ന സംസ്ഥാന ടെന്നീസ് ഭാരവാഹികൾ ഈ നിർദ്ദേശങ്ങളെ തുറന്ന മനസ്സോടെ സമീപിച്ചു, ഈ കളിയെ കൂടുതൽ ജനങ്ങളിലേക്ക് എത്തിക്കാൻ വേണ്ട നടപടികൾക്ക് തുടക്കം കുറിക്കും എന്ന് പ്രത്യാശിക്കാം. നാളെ കിണറ്റിങ്കൽ കോർട്ടുകളിൽ ആദ്യത്തെ ‘ലവ് ആൾ’ മുഴങ്ങുമ്പോൾ, കേരളത്തിലെ ടെന്നീസ് ആരാധകർ കാത്തിരിക്കും, ഒരു നല്ല നാളേക്കായി.
